Vawiin khan Health Minister Pu Lalrinliana Sailo office-ah Mizoram sorkar Health & Family Welfare Department leh Cure International India Trust ten kum nga (5) chhung atan thawhhona thuthlung an ziak a. Mizoramah kelek natna nuaibo a nih theih nan Cure Clubfoot Mizoram Project chu kalpui a ni dawn.

Cure International India hi 2009 a din niin India rama kelek (clubfoot) nuaibo tuma hmalatu tlawmngai pawl an ni a, kelek hi tihdam theih a nih zia mipuite hriattirin hmun kilkhawr ber a cheng mi rethei ber te pawhin kelek enkawlna a thlawna an dawn ngei theihnan hna an thawk a ni. State hrang hranga sorkar damdawiin te nen tangkawpin kelek enkawlna clinic an siam a, heng clinic pantute chu an inenkawlna senso zawng zawng an tumsak vek thin. State hrang hrang 8 (pariat) nen thawhhona thuthlung (Memorandum of Understanding) an lo ziak tawh a, Mizoram hi a 9 (pakua)-na a ni. India ramah hian kumtin nausen kelek 150 vel piang thin anga chhut a ni a, Mizoramah erawh chuan tun dinhmunah mi 30 atanga 50 vel bawrin he harsatna hi an nei nia ngaih a ni.

Kelek enkawl dan tha ber, zaipui tawh ngai lova kelek tihdam dan, Ponseti Method an tih chu an ni pawl hian an hmang a, kutlek te pawh an enkawl tel a ni. Thlaruk danah Refresher Training buatsaih ziahin Counsellor tam tak an ruai mek bawk a. Mizoram Doctor te pawh a tul dan angin training pek an ni dawn a, kar tawp Inrinni hian Doctor thenkhat training nei tur hian Guwahati an pan ang. Kartin Ningani apiangin Aizawl Civil Hospital Ortho OPD -ah Clinic hawn a ni dawn a. Hetiang lama harsatna nei te chuan karleh ningani atangin he Clinic hi pan nghal theih a ni ang.

Cure International India -ah hian Dr Belinda Bennett Chairman-na hnuaiah National Board Member paruk an awm a, chung zingah chuan Mizoram atangin Pi Zohmingthangi Sailo a tel a. Mizoramah pawh mi 11 telna Core Committee din a ni tawh bawk.