2621/2024-2025

Dated Lawngtlai, 21st October 2024 : India ram chhung hmun hrang hranga Police- te rualin tukin zing dar 7 khan 3rd IR Battalion, Thingkah chuan 'Police Commemoration Day' an hmang a, Pu F. Lalbiakzauva, MPS, Commandant, 3rd IR Battalion, chuan he hun hi a kaihruai.

Pu F. Lalbiakzauva chuan 'Police Commemoration Day' chu kum 65 zet hman lo ni tawhin, Police- te tan chuan ni pawimawh tak a ni, a ti a. India ramin zalenna a hmuh atang khan India ramah Police Duty laia boral ( Martyr) 34832- an awm tawh a ni, a ti. September ni 1, 2023 atanga August ni 31, 2024 inkarah duty laia boral Police -216 an awm thu tarlangin, Mizoramah erawh duty laia boral an awm lo a ti. Pu F. Lalbiakzauva chuan Mizoram Police - te Râl hmaa boral awmlo mah se, natna leh chhan hrang hrang avanga kum tin nunna chan an awm fo thin chu pawi a tih thu a sawi a. Mahni hriselna ngaipawimawh tur leh fimkhur zawka nun hmang turin 3rd IR Battalion- a Police awm mek te a chah nghal a ni.

Police Commemoration Day- hi kum 1959- a Hotspring, Ladakh hmuna China sipaiten India Police an 'lambun' naa boraltate hriatreng nan leh India ram chhunga Police Duty laia boral ( Martyr) te sûnna atana hman thin a ni a. Kum 1966 atanga vawiin ni thleng hian ram leh hnam tana nunna hlan (Martyr) Mizoram Police -54 an awm tawh.

Police Commemoration Day - denchhen hian 3rd IR Battalion, Thingkah, chuan "Cleanliness Drive, Tree Plantation leh Blood Donation " hman chhunzawm an tum thu an tarlang a ni.