2622/2024-2025

2024 Khuangchawi thla ni 21: Lunglei District chhunga vantlang tana ei leh in siamna hmunte'n thianghlim leh hrisel taka  ei siam leh zawrh an kalpui theih nana District Level Advisory Committee on Safe Food & Healthy Diets-in thingpui dawr leh ei siamna hmunte endik tura joint inspection team a din chuan a ṭum khat nan vawiin khan thinghlimna leh hriselna kawnga Lunglei khawpui chhunga thingpui dawr leh restaurant-te dinhmun an endik.

Joint inspection team hi an Convener, Lunglei District Additional Deputy Commissioner & Adjudicating Officer Pu James Miahlung chuan hovin, a thawh khat nan thingpui dawr, restaurant leh bakery-te tana endikna tur duan sa hmangin Lunglei khawpui chhunga thingpui dawr leh restaurant sawm an endik a. Bawlhhlawh bawm awm dan te, kut silna leh thleng silna hmun te, kut hrukna/tui in tur/inthiarna dinhmun te, ei tur vawn ṭhat dan te, ei siamtute leh ei siamna hmun fai leh thianghlim dan te, ei tur dah ṭhatna him leh phui a awm leh awm loh te, Food Safety Standards Authority of India (FSSAI) registration an neih leh neih loh leh inkaihhruaina an zawm ṭhat leh ṭhat loh te, faina, thianghlimna leh hriselna kawnga an chet dan hrang hrangte endikin, an dinhmun azirin point an pe hlawm a ni.

Lunglei District Level Advisory Committee on Safe Food & Healthy Diets chu September ni 23, 2024 khan ṭhu khawmin, Lunglei District chhungah ei leh in hrisel leh thianghlim chauh siam chhuah leh zawrh a nih theih nan leh FSSAI inkaihhruainate ṭha taka zawm a nih theih nana hma lakna tur ruahmanna hrang hrang an siam a. DLAC hian khawpui chhunga ei siamna hmunte endik turin Addl DC & Adjudicating Officer, Lunglei District convener-na hnuaiah joint inspection team dinin, LMC Secretary; Lunglei SDPO; Food Safety Officer; Inspector of Supply; Inspector of Legal Metrology; Pu R. Vanlalmalsawma, Member, DLAC on Safe Food & Healthy Diets; Pi Zomawii Hrahsel, Member, DLAC leh Local Council Association President te chu member an ni a. Joint inspection team hian a remchan dan angin a tahtawlin endikna hi an kalpui chhunzawm zel dawn a ni.