2623/2024-2025
Aizawl, October ni 21, 2024: State Disaster Management Authority pawmpuinain African Swine Fever (ASF) chu kum 2024 chhung atan leh Mizoram State huamchhung atan State Specific Disaster-ah puan a ni ta a. State Executive Committee thutlukna angin he State Specific Disaster avanga chhiatna tawkte chhawmdawlna chu Disaster Management Act, 2005, Section a8(1)(a) hnuaia siam, State Disaster Response Fund (SDRF) atangin pek tur a ni. State Disaster Response Fund (SDRF) leh India sawrkar hnuaia Ministry of Home Affairs-in kum 2022-23 atanga 2025-26 inkar atana National Disaster Response Fund (NDRF) hmanga chhiatna tawkte chhawmdawl dan tur kalphung a duan chu he chhiatna thleng atan hian kum 2024 chhungin hman tur a ni.
Chutichuan ASF hri leng avanga chhiatna tawkte chhawmdawl dan tur kaihhruaina kimchang chu hetiang hian SEC remtihnain siam a ni:
1) Vawk vulh chi leh ram vawk/sanghal zinga virus natna inkaichhawn theih leh thihpui theih hri leng hi ASF hri leng tia sawi chu a ni a. World Health Organisation chuan ASF hi thihpui tham natna, a kai zawng zawng tana thihpui theih a ni tiin a pawm a.
2) Tuna sawrkar thuchhuah bik atan hi chuan, kum 2024 kurna sawrkarin ASF hri kai a hriat hmasak ber ni chu Mizoram State chhunga ASF hri len tan hun anga ngaih a ni ang.
3) Kum 2020 June thlaa India sawrkar hnuaia Ministry of Fisheries, Animal Husbandry and Dairying-in National Action Plan for ASF a lo siam tawh zulzuia State ramria 'check point' zawng zawngah leh State chhung hmun hrang hranga hri leng laka invenna atana 'bio-containment' leh 'bio-security measures' a lo ruahman tawh chu he thil atan hian hman nghal tur a ni.
4) Prevention & Control of Infectious and Contagious Disease in Animals Act, 2009, Section 20-nain a sawi angin, District Veterinary Officer-te chu an bial chhunga ASF ang chi ran natna a lo darh veleh 'infection zone' siam tura mawhphurhna pek an ni. Chutianga ruahmanna siam a nih veleh chumi district Deputy Commissioner chuan National Action Plan for ASF zulzuiin khuahkhirhna thupek a chhuah thin ang. Chutianga 'infection zone' siam bik huam chhungah chuan National Action Plan for ASF-in 'infection zone' enkawl dan tur a duan sa, 'Standard Operating Procedure' chu zawm nghal vek tur a ni. ASF virus darh zel tur veng tur hian 'infection zone' mumal taka enkawl a nih theih nan District Veterinary Officer-te chu an awmna khua/ municipal body/ autonomous council leh district thuneitute nen tha takin an thawk ho tur a ni.
5) SDRF inkaihhruaina hnuaiah hian vawk hi eizawnna atana ran vulh tenau zinga chhiar tel a nih angin, ASF hri avanga vawk chante chu SDRF huamchhungah hian chhawmdawlna pek theih an ni ang.
6) ASF vanga vawk thi chhawmdawlna hi mahni awmna district theuhvah Animal Husbandry & Veterinary Department hnuaia District Veterinary Officer hnenah dil tur a ni.
7) ASF vanga vawk thi nia hriatte chu District Veterinary Officer-in a en fiah hnuah a dik chuan lehkha (certificate) a siam ang.
8) DVO chuan chhawmdawlna dilna chu Deputy Commissioner, District Disaster Management Authority Chairperson ni bawk hnenah ASF vanga vawk thi tih hriatpuina certificate nen a thawn ang a; DVO-in certificate a siam tel lo chuan dilna hi pawm theih ni lo vang.
9) He chhawmdawlna hi ASF natna avanga vawk thi atan chauh pek theih a ni a. Hri leng venna tura vawk suat a huam lo vang. Vawk suat avanga vawk chante chhawmdawlna chu a hranpa in sawrkar laipui tanpuina, Assistance to States for Control of Animal Disease (ASCAD) hnuaiah pek theih a ni thung.
10) Chhawmdawlna dilna chu vawk thih ni atanga ni 30 (sawm thum) emaw, he thuchhuah ni atanga ni 30 (sawm thum) emaw chhungin theh luh hman tur a ni.
11) SDRF inkaihhruaina ang chuan ran vulh lai hloh avanga chhawmdawlna hi ran vulhtu tenau/ran vulhtu ram nei lote, thuneitute hnena an ran vulh leh vulh zat chhinchhiah thlapte hnenah chauh pek theih a ni a. Amaherawhchu, ASF hri leng hi hriat lawk loha thleng thut a nih avang te, ran vulhte hi mumal taka chhinchhiah a nih loh avang te, ran vulhtu tam takin ran tam tak an hloh avang tein tum khat ngaihhnathiamna pek an ni dawn a. ASF vanga thi a ni ngei tih chianna DVO-in lehkha a pek, 'mortality certificate' tia vuah chu ran vulh leh vulh zat chhinchhiahna angah pawm tur a ni. District Veterinary Officer zawng zawngin ran vulh chi hrang hrang leh vulh zat chhinchhiahna hi an vawng ang.
12) Tun atang chuan Animal Husbandry & Veterinary Department chuan vawk vulhtu zawng zawng, an vawk vulh chi leh vulh zat nen mumal takin an chhinchhiah zui tawh tur a ni. He mawhphurhna hi District Veterinary Officer-te kutah dah a ni ang a. Department dang leh thuneitu dang, Village Council, Municipal Body, District Administration hh Autonomous District Council te chuan DVQ-te hi an mamawh ang zelin hemi kawngah hian an tanpuiin an thawhpui thin ang. DVO chuan Village Council, Municipal Body leh Autonomous Disctrict Council tin huam chhunga vawk vulhtu leh an vawk vulh chi leh vulh zat chhinchhiahna lehkhabu a vawng ang. He chhinchhiahna hi kum tin kum tirah en nawn ziah tur a ni. Heng ran vulh chhinchhiahna hi kum tin March ni 31 hma in DVO-ten Director, Animal Husbandry & Veterinary hnenah an theh lut ziah tur a ni.
13) ASF hri leng avanga vawk hlohtute chhawmdawlna chu SDRF kalphung angin vawk pakhat zelahRs.4,000/- (cheng sang li) zel pek theih a ni ang.
14) Kum 2024 chhunga ASF vanga harsatna (State Specific Disaster of ASF for 2024) bik atan erawh hi chuan vawk thi chu eng zat pawh ni se la, chhawmdawlna hi chhungkaw khat tan vawk paruk chin atan chauh pek theih a ni ang.
15) Deputy Commissioner hnena dilna lut zawng zawng chu chhawmdawlna pek chhuah tura Disaster Management & Rehabilitation Department hnena thawn a nih hmain uluk taka en fiah vek phawt a ni ang.
16) He chhawmdawlna hi District Disaster Management Authority (DDMA) / Deputy Commissioner-te hnenah pek chhuah a ni ang a. Anni hian a dawngtu turte bank account theuhah an lo pe chhawng ang.
17) Sawrkar scheme dang hnuaia ASF vanga vawk thi tanpuina lo dawng tawhte chuan he chhawmdawlna hi an dawng thei lovang.
18) He sawrkar thuchhuah hi sawrkar vekin a hnuh dawh hma chuan hman reng tur a ni.
He kaihhruaina hi State Executive Committee (SEC) leh Chairman, State Disaster Management Authority (SDMA)-te remtihpuinaa chhuah a ni.
