Aquatics Association of Mizoram-in an buatsaih tui inhleuhsiak - Mizoram Open Swimming Championship vawi 3-na chu, Aquatics Complex, Lawibual-a ni 2 awh neih mek chu vawiin khan khar a ni a, Revenue Minister Pu J.H.Rothuama’n a hmanpui.
Khuallian Pu J.H.Rothuama chuan thusawiin tui chenna tur Mizoram kan neih tlem zia hriaa Mizoram Sorkarin tui chenna leh diving zirna hmun changkang din tura hma a lak mekna chu lawmawm a tih thu a sawi a, Mizo te zinga tuichen zirna leh tihhmasawn nana mi thahnemngai ten Aquatics Association of Mizoram din nachang an lo hriat avangin lawmthu a hrilh bawk. Mizoram ah kum tin tui tla kan tam thin chu pawi tiin Minister chuan tuihleuh thiam tura kan inzirtir uar zel a tul a ni, a ti bawk. Mahni tihdan ringawt duhtawk lova, ram leh hnam changkang zawkte tih entawna tuihleuh dan dik leh tha zawk te zirchhuah tum zel turin infiam mite chu a fuih bawk. Tumruhna leh insumna tel lovin taksa hrisel a neih theih loh tih hriaa zuk leh hmuam leh ruihtheih thila inthiar fihlim tlat thin turin a chah bawk.
Mizoram Open Swimming Championship 2012 kharna inkhawm hi AAM Patron cum Technical Adviser Pu R.Thanga’n a kaihruai a, report te ngaihthlak niin Mizo ten tuichen lam hma kan sawn theih nana Sorkarin Swimming leh Diving zirna hmun tha tak din a tum chungchangah lawm thu an sawi. Tuihleuh intihsiakna chi hrang hrang - Freestyle, Breaststroke, Butterfly leh Relay hmangte-in final neih a ni a, tun tum Swimming Championship ah hian mipa 16 leh hmeichhia 8 an tel a ni. Swimming Championship kharna hun hi Mizoram State Sports Council hotute leh Sports Association hrang hrang hruaitute bakah chanchinbumi ten an telpui a ni.
AAM hi 2009 ah din a ni a, nikum khan Maharashtra atangin NIS Coach te chah chhuakin tuichen inzirtirna hun te an hmang ho a, Mizoram khaw hrang hrangah kalin tuicheng thiam inzawnna leh inzirtirna te an buatsaih thin a ni. Tunah hian an hnuaiah Coach 16, 1st Class Judge 12 leh 2nd Class Judge 17 an nei mek a ni.
