Bamboo Development Agency, Industries Department leh UNIDO, Guwahati tangkawpin Mizorama a vawi khatna atana an buatsaih Mau hmanga thilsiam zirna ‘Training on Bamboo Product Development’ vawiin khan khar a ni ta. Kharna inkhawm hi Pu Lalthangliana Murray, IFS, Conservator of Forest & State Mission Director, National Bamboo Mission chuan khuallian niin a hmanpui a.

Pu Lalthangliana Murray, IFS chuan UNIDO leh BDA tangkawpin hetianga mau hman tangkaina training an buatsaih hi a hlutzia leh trainees te tan pawh hman tangkai zui tlak thiamna neih theihna tur a nih thu te, mau hmanga thilsiam tute tana mau leh hruihnang lama harsatna awm theite a theih anga sutkian sak zel tura an inhuam thu te a sawi bawk. Thu a sawi zawhah khuallian hian trainees mi 20 hnenah certificate a hlan nghal a ni.

Tarlan tawh angin he training hi United Nations Industrial Development Organisation (UNIDO), Guwahati in an cluster partner – Bamboo Development Agency, Mizoram kaltlanga an buatsaih a ni a. Tuna mi hi phase-I a ni a, ruahman dan chuan a aia training hun chhung pawh rei deuh zawkin training hi neih chhunzawm zel tum a ni.