Vawiin khan Mizoram State Anti Tobacco Day vawi 3-na chu Tourist Lodge Conference Hall, Chaltlang-ah hman a ni a, he hunah hian Mizoram Chief Minister Pu Lal Thanhawla chu Khuallian niin vaihlo zuk leh hmuam dona kawnga tithate hnenah lawmman a hlan.

Health & Family Welfare Commissioner Pu Lalrinliana Fanai kaihhruaiah Pu Lal Thanhawla chuan vaihlo zuk leh hmuam thatlohzia hre duh tan chuan sorkar, NGO, kohhran leh mimal anga inzirtirna leh inhrilhhriatna nasa takin kalpui tawh a ni a; hma kan sawn hre hret a, tan pawh nasa lehzuala lak theuh a tul takzet a ni, a ti. ‘Tobacco Free Generation’ siam tumna lamah naupang leh thalaite zingah vaihlo thatlohna inzirtir a pawimawh a, zirna in leh kohhran tinah zuk leh hmuam thatlohzia sawi uar a tul a ni, a ti bawk. Puar leh fanna ni si lo, mihringte hriselna tichhetu zuk leh hmuam hi Mizoten kan kalsan a hun tawh a, a tute pawhin he thil thalo sim theihna kan nei theuh a; ‘Healthy Mizoram, Healthy Mizo People’ siam turin mi zawng zawng tan la theuh turin a ngen.

Indian Society on Tobacco & health (Mizoram Chapter) Pi Lal Riliani pawhin thusawiin state dangin an neih ve lo ‘State Anti Tobacco Day’ Mizoramin kan nei hi a vanneihtlak a; vaihlo leh kaihhnawih tihremna kawnga an hmalaknate theihtawpa thlawp thin sorkar kan nei hi a lawmawm takzet a ni, a ti. Mizote chu pi leh pute hun lai atangin zuk leh hmuam uar hnam kan ni a, thil thalo leh zahthlakah pawh kan ngai lo thin a, vaihlo avangin Mizoten hriselna lamah harsatna nasa tak kan tawk a, amaherawhchu Anti-Tobacco Programme hmalakna avangin mi tam takin zuk leh hmuam an sim phah bakah ni 25th May 2013 khan Mizora,-a ‘Tobacco Free Village’ hmasa ber Thingsulthliah Tlangnuam puan a ni ta a; tunah chuan Mizoram khaw engemawzatin ‘Tobacco Free’ nih tumin tan la mek zel chu a lawmawm hle a ni, a ti bawk.

Mizoram State Anti-Tobacco Day 2016 inkhawmah hian Dr.Jane R.Ralte, State Nodal Officer, National Tobacco Control Programme chuan an hmalakna hrang hrang leh kumina thupui ‘Vaihlo laka fihlim thangtharte (Tobacco Free Generation)’ hmangin presentation hun a hmang a. H&FW Principal Director Dr.K.Ropari chuan vaihlo zuk leh hmuam kawnga hma la turin kalkhawmte ‘Thutiam’ lakna hun a kaihruai a. Aizawl DC leh Chairman Aizawl District Anti Tobacco Squad Pu Kannan Gopinathan kaihhruaina hnuaiah Aizawl District chhunga vantlang hmuna meizuk khapna kawnga tithate lawmman sem a ni bawk.

Mizoram State Anti Tobacco Day 2016-a vantlang hmuna meizuk khapna kawng Exemplary Perofrmace in Tobacco Control’ a tithate chu :

1. Govt. Hospital : Aizawl Civil Hospital

2. Govt. Office : Forensic Science Office

3. Educational Institution : a). Govt. M/S-II Durtlang, b). Govt. P/S-III Saitual

4. TV Channel : a). Zonet Senhri, b). Zonet Nauban

5). NGO : Kanan Veng Branch YMA te an ni.