Vawiin chawhma khan Assembly Annex Conference Hall-ah 3rd National Handloom Day hman a ni a. Commerce & Industries Department changtu Parliamentary Secretary Pu Joseph Lalhimpuia chu Khuallian a ni. 

Khuallian Pu Joseph Lalhimpuia chuan “Handloom hi Mizo thil dehchhuah khawvel hmaa phochhuah tlak leh remchang ber a ni” a ti a. Mizoramah puantahtu kan pung nasa a, inelna sang zelah design nalh leh kutchhuak mam tha neih a pawimawh  a ni, a ti a. Pu Joseph Lalhimpuia chuan handloom hmanga thil siam chhuahte hi ram pawna thawnchhuah theih zinga pawimawh tak niin kan ram ei leh bar-ah  thui tak min pui thei dawn a ni, a ti a. Mizorama puantah tam zawk  acrylic hmanga siam hi silk leh natural fibre-a thlak a tul thu sawiin hei hian handloom hmanga sumdawnna  bakah ram pawna thawnna kawngah pawh  hmasawnna a thlen tur thu a sawi a. Puantah tur chuan zirna leh thiamna hranpa neih a ngai lo tiin taihmak leh thawhrim a tul thu a sawi a. ‘ Mizoram Handloom Research and Promotion Council’ din anih tawh thu tarlangin NEDP hnuaiah natural fibre hman dan tur inhrilhhriatna Mizoram Handloom Research and Promotion Council hian an kalpui tur thu leh hemi kawngah hmalak mek anih thu a sawi a. Kan puantahte neitu nihna kan neih theih nan Geographical Identification (GI) neih a tul a ni tiin khawvel hmun hrang hrangah kan puan design-te neitu nihna diktak kan nei thei dawn a ni, a ti a. Mizoram Handloom Export Facilitation Hub Thenzawl-ah din tura hmalak mek anih thu Parliamentary Secretary chuan a tarlang bawk a ni. 

National Handloom Day hi kum 2015 atang khan hman tan niin  Commerce & Industries Department leh Weaver Service Centre, Development Commissioner for Handloom, Ministry of Textile, Govt. of India tangkawpin an buatsaih a ni. 

He hun hi Commerce & Industries Dept. Director Pu J. Hmingthanmawia chuan kaihruaiin kalkawmte lawmna thu a sawi a. National Handloom Day pual hian handloom hmasawnna atan hemi lama thiam bikte atangin zirtirna ngaihthlak niin chungte chu-

'Man man zawka kan puantahte hralh theihna tura hmalak dan'

 – Pi Laltanpuii

'Handloom eizawnna tlak a ni reng a ni'

Pi K. Lalmuanpuii

'Handloom Scheme hrang hrang te'

Pu C. Lalchhandama  (JD) 

Chawhnu lamah Interactive session neih nghal niin Joint Director Pu C. Lalchhandama chuan lawmthu sawina in hun a khar a ni.

Attachment

  • Loading attachment...