Kumin fur chhunga Mizoram hmun hrang hranga tuilian leh leiminin thil a tihchhiatte a hmuna enfiah tura Sawrkar Laipui din Inter-Ministerial Central Team te chuan an hotu Shri Dilip Kumar, Joint Secretary (Centre-State Division), Ministry of Home Affairs hovin nimin khan Tlabung an tlawh. He Inter-Ministerial Central Team te hi kumin June thla a Khawthlang Tuipui lianin Tlabung khua leh a chhehvela in leh lo a tihchhiatte a hmuna enfiah tur leh zirchiang tura lo kal an ni. Central team hi Pu Zosangliana, MPS, Joint Director (OP), Department of Disaster Management & Rehabilitation (DM&R)- in a rawn tawiawm a ni.

Central team hi Pi V.Lalmuanpuii, BDO Lungsen Block, Pu Daniel Sailo, ASO Lunglei District, Pi C. Lalremruati, Lunglei District IPRO, Pu K. Beimotaosa, Tlabung SDPO leh official dangte bakah khawtlang hruaitu VC- te leh tlawmngai pawl aiawhte leh BSF hotuten Tlabung Helipad-ah lo dawngsawngin Tlabung leh a chhehvela tuilianin thil a tihchhiat leh mihring chenna in engemawzat a len bo tak hnuhma leh chhiatna tuarte dinhmun a hmunah an enpui a. Central team te hian he khuarel chhiatna thleng chungchang an hriat duh hrang hrang official-te zawtin report kimchang tak Sawrkar laipuia thehluh tur an buatsaih mek a ni.

Tuilian vanga chhiatna a hmuna an enfiah hnu hian YMA Hall, Tlabungah inkawmhona hun tawi hman a ni a. He inkawmhona hunah hian Pu Daniel Sailo, ASO Lunglei District chuan thu sawiin tuilian vanga harsatna tawkte chhawmdawlna hna chu Mizoram sawrkar, khawtlang hruaitu leh tlawmnngai pawlte leh BSF-te tangrualin theihtawp chhuaha kalpui chhoh mek anih thu kalkhawmte a hrilh a. He chhiatna rapthlak tak thleng avang hian chhungkaw tam takin an in leh lo, an eizawnna an chan a ni tiin, heng mi te hian tanpuina an mamawh takzet a ni, a ti bawk. He huna thu sawitu dang Pi C.Lalremruati, Lunglei DIPRO chuan chhiat tawhna a hmunah ngei Sawrkar laipui official ten an rawn tlawh thei chu Tlabung mipuite tan malsawmna a ni tiin, Central team te lo dawngsawng tura sawrkar department hrang hrang te anlo inpuahchah dan tlangpui a sawifiah bawk. He hunahhianVillageCouncil hotute bakah tuilian vanga chhiatna tuarte atangin thusawi ngaihthlak bawk a ni

Inter-Ministerial Central team te hi zan thum riak turin 4^th August-ah Mizoram lo thlengin hemi ni vek hian Aizawl leh a chhehvel a leimin leh tuilianin thil a tihchhiatte a hmunah an enfiah bakah Mizoram sawrkar official pawimawh te nen meeting neiin an thukhawm a ni. Inter-Ministerial Central team member lokal te chu a hnuaia tarlan te hi an ni:

1)      Shri Dilip Kumar, Joint Secretary (CS), Ministry of Home Affairs

2)      Dr. Virendra Singh, Director, DRDPatna

3)      Shri BK Mishra, Assistant Director, Ministry of Finance

4)      Shri Pradeep Kumar Lal, Executive Engineer, Guwahati

5)      Shri Mohit Verma, Assistant Director, Ministry of Rural Development