Nimin khan Commerce & Industries Minister Pu H .Rohluna chuan Saichal khua a NEDP hnuaia khawchhung kawng siam mek chu a hmunah kalin a enfiah.

Kawng hi Metre 530 vel niin Metre 400 vel chu siam zawh tawh  niin la zawhlo hi siam chhunzawm mek a ni. Hemi bakah hian Hliappui khua a NEDP hnuaia kawng leh Side Drain siamtur proposal awm te chu enfiah bawkin chak zawka hmalakpui a tum thu a sawi. 

Minister chuan kalkhawm mipuite hmaa thu sawiin Sawrkar chuan a tihtur tiin tanpuina chu a sema a hlawhtlinna erawh chu tanpuina dawngtute kuta a innghah thu a sawi a ni. Sawrkar chuan engkim titheilo mahse mipuite tan theihtawp a chhuah zel tur thu sawiin Rinawmna leh taihmakna nena thawh chuan hlawhltinna rah seng tur a awm thin tiin NLUP a ni emaw NEDP a ni emaw Sawrkar policy hnuaia tanpuina dawngte chu midangte tana entawntlak leh midangte cho chhuaktu ni turin a chah bawk a. Chutih laiin tanpuina dawngtu tamtak tanpuina chu a nihna tur anga hmanglo tan chuan hlawhtlinna rah sengtur a awmloh thu sawiin Mizote chu hnam intodelh ni turin taimakna, tumruhna leh thawhrimna nen chhungtin te kan tan tlan a pawimawh thu a sawi bawk a ni. 

Bialtu MLA ni bawk chuan Saichal leh Saitual inkar kawngpui pawh thawmtha tura hmalak mek a nih thu a tarlang a, Estimate leh Proposal te siam zawh a nih chuan kawngpui thawmthat hna chu tan thuai a nih tur thu a sawi a ni. Hemi bakah hian Chief Minister’s Rural Housing Scheme chu tun dinhmunah Mizoram chhunga District 3 Siaha, Lawngtlai leh Serchhip ah kalpui mek a nih thu sawiin District dangah pawh hman thuai turin hmalak mek a nih thu a sawi bawk. Minister hi Commerce & Industries Addl. Director Pu C.Lalbiakthanga leh Champhai District SSA Dy DPC Pu H. Lalhminghlua ten an tawiawm a ni.