‘Father of Modern Statistical System in India’ tia hriatlar Prof. Prasad Chandra Mahalanobis hriatreng nan a pian champha June 29 hi kum 2007 atang khan India ramah ‘Statistics Day’-ah hman tan a ni a. Vawiin khan India hmun dangte rualin Mizoramah pawh Economics & Statistics Department buatsaihin he Ni lawmna hi Agriculture Conference Hall-ah neih a ni a, Mizoram Speaker Pu R.Romawia chu Khuallian a ni. Kumin Statistics Day thupui chu “Price Statistics” a ni.

 

 

Khuallian chuan 3rd Statistics Day lawmna inkhawmah thu sawiin ram leh hnam humhim tur chuan statistics dik, kimchang leh tharlam thei ang ber neih a tul a ni, a ti. Hmasawnna tur ruahmanna hrang hrang tihpuiltinna tur pawhin statistics dik leh rintlak bawk a pawimawh thin a. Mizoramah hian mihring maktaduai 1 vel, Village Council 791 leh khaw 800 vel kan nei a, khaw tinah village registration fel tak nei thei ila chuan kan hlauh em em chimral te pawh hi hlauh tur a awm lovang, a ti. Ram leh hnam changkang apiangin statistics pawimawhzia an hria a, a pawimawhna kan hriat tawk loh hi nakin huna kan inchhirna tur a ni ang tih a hlauhthawn thu Speaker hian a sawi. Pu Romawia chuan a mimal thuhthlung vawn reng sawichhuakin Mizote hian chawmhlawm leh kutdawh thinlung pu tawh lovin petu leh dawngtu thinlung pu thiam ila, chutah pawh chuan petu thinlung hi nei lian fo zawk ila a duh thu kalkhawmte chu a hrilh a ni.

He Ni pual hian Speaker chuan Economics & Statistics Directorate lehkhabu chhuah thar tangkai tak tak pathum - 1). Annual Report of Registration of Births & Deaths 2007, 2). Agriculture Input Survey 2001-2001 leh 3). Meteorological Data te a tlangzarh.

He huna thu sawi ve Economics & Statistics Diretor Pu Ngunlala Chinzah chuan ram hmasawnna tura ruahmanna siamnaah statistics chu  thil tul hmasa ber a nih thu te, Mizoramah pawh statistics fel leh dik nei tur chuan chhungkaw tin leh khaw tin tlawhchhuah tul changte a awm thin avangin hemi kawngah hian department chuan sum indaih lohna avangin harsatna hrang hrang a tawh mek te a tarlang a ni.

Chawhnu lamah Technical Session neiin Department-in hma an lakna hrang hranga thil pawimawhte an sawiho a. State Domestic Product, Price Statistics leh Highlights of Statistics te chu vawiina an sawiho langsar zual deuhte chu an ni.