384/2023-2024

Aizawl, 10.05.2023: Chief Minister Pu Zoramthanga chuan May ni 9, 2023 zan khan online streaming application "Thulkhung" chu Music Home, Zonuam ah khuallian niin a tlangzarh. ICT Department hnuai a Mizoram State e-Governance Society MSeGS leh Music Domain Mizoram (MDM) tangkawpin a siam Thulkhung App hi Audio/Video lei emaw hawh (Rent) theih tur a duan, zai mite'n an music video leh hlate mipui lei theih turin man tlawm te a chhawpchhuah na a ni.

Chief Minister chuan Music Domain Mizoram bultuma zai mi te leh ngaithlatute tana hmasawnna thar buatsaih a ni chu tangkai taka hman a nih ngei a beisei thu a sawi a. Entertainment khawvelah pawh hmasawn tura tan lak zel a pawimawh thu a sawi a. Khuallian chuan mihring chu khawvela kan hun neih tam zawk chu hah taka hnathawh nan kan hmang thin a, taksa leh rilru a lo hahdam theih nan entertainment a tul thin thu a sawi a. Tunlai technology hmasawnna rual pha tura hma sawn theih ve zel chu tha a tih thu sawiin, kum reilote chhunga media technology hmasawnna in nunphung a thlak danglam dan te, awlsamna nasa tak a siam dan te a sawi a. Chief Minister chuan heng hmasawnna te hi a tha zawnga hman thiamz el a pawimawh thu sawiin, Thulkhung App tlangzarh tak pawh chu tangkaina thlentu a lo nih zel a beisei thu a sawi bawk.

He app siamtu Mizoram State e-Governance Society aiawhin Programme Manager Pu Isaac Zothanpuia hnen atangin technical report ngaihthlak a ni a. He application hi mobile phone leh computer ah te hman theih niin, Digital Goods e.g Music Video, Films, Audio te hralh theihna tur a platform a ni a. Audio/Video lei emaw hawh (Rent) theih tur a duan leh chhawpchhuahna a ni a. Android/Apple phone app leh internet browser hmang te a access theih tur a duan a ni bawk.

Thulkhung chhung a digital goods zawrh chhuah te hi a hmangtu te tan a awlsam zawk theih nan CDN (Content Delivery Network) hmang a deliver a ni a, Internet tha lutuk loah pawh buaina awmlo tur a duan a ni. Video Content (Music Video & Film) bikah phei chuan an network a zir a video quality inthlak thei a siam a ni.

Security chungchangah chuan Thulkhung a digital goods (Audio, Music Video & Film) te hi DRM (Digital Right Management) Technology hmanga thuam niin, Screen Record, Screenshot leh content edit leh forward lakah him in, Content piracy laka him tur a ngaih a ni a. Audio bikah chuan AWS Signed URL technology hmang a content security hi thuam a ni bawk. Storage ah chuan khawvel a cloud computing tha leh rinthlak ber AWS cloud server hman a ni a, Performance tha thawkhat tur a ngaih a ni. Storage ah hian AWS Simple Secure Storage (s3) hman niin thulkhung a digital content hi him tawk hle tur a ngaih a ni.

Lei leh hralhna atan India ram chhung a Payment Aggregator lian ber Paytm, Payment Gateway hman a ni a. UPI, Netbanking, Debit Card, Credit Card te hmanga content te hi lei leh hawh theih a ni.

MDM lam atangin Pu JH Lallungmuana chuan he app hi siam puitlin a nih theih nan a hmalak a nih dan tlangpui sawiin, he app kaltlanga artiste te'n hlawkna nasa tak an tel theih tur thu a sawi a. Paid content bakah a thlawn a en theih chin pawh engemawzat a awm tel thu a sawi.

Thulkhung app hi website www.thulkhung.com ah lutin a download theih a ni.