No.2812/2021-2022
Aizawl the 31st October 2021: Vawiin chawhnu khan Dr.H.Lalthlangliana, District Election Officer, Kolasib chuan 4-Tuirial (ST) AC Bye-Election kalpui dan chungchangah thutharlakhawmtute a kawm a, harsatna leh buaina lian tham awm lovin inthlanna felfai tak neih a nih thu a sawi.
Dr.H.Lalthlangliana chuan Voter 17,911 awmna 4-Tuirial (ST) Assembly Constituency-a bye-election felfai tak kalpui a nih chungchangah District Election Office hnuai a thawktute zawng zawng chungah lawmthu a sawi a, inthlanna thianghlim awm theih nana a tul apianga che chhuak thintu Mizoram Peoples’ Forum, YMA-te leh Media lam a thawktute hmalakna fakawm a tih thu a sawi bawk a ni.
4-Tuirial (ST) AC huam chhung a Polling Station 27-a vote tlak dan tlangpui tarlangin Tripura Bru Camp-a awmte tan a hranpa a Polling Booth siam a nih loh thu a sawi a. Bru Camp-a awm mi 652-ten vote an thlak lova, heti chung hian vote 14,561 tlain za zel a 81.29 a nih thu leh Ballot paper hmang a vote tla 34 a awm bawk thu a sawi. Hrileng kar a inthlanna kalpui a nih angin Polling Station tin ah Covid-19 SOP uluk tak a kalpui a nih thu leh Covid-19 hri kai mi 34-ten, inthlanna hun hawn chhunga darkar hnuhnung ber, tlai dar 5 leh dar 6 PM inkarah vote an thlak thu a sawi bawk a ni.
Vote thlakna bungruate hi nizan dar 11:30 PM vel khan Strong Room-ah him takin a thleng kim tawh a, November ni 2, 2021 zing dar 8:00 AM atangin Vote hi chhiar tan tur niin hemi ni vek hian result hi puan hman tum a nih thu DEO hian a tarlang bawk a ni.
4-Tuirial (ST) AC Bye-Election neih taka Polling Station-a voter upa ber chu Pi Zatangi, Kum 97 mi niin Lungdai Polling Station-ah vote a thlak a ni.
Vawiin vek hian DC Conference Hall-ah 4-Tuirial (ST) AC Bye-Election Scrutiny neih a ni a, General Observer, Pu Mohammed Ali Shihab, IAS kaihhruainain Political Party hrang hrang aiawhte’n Polling neih dan leh Vote a tlak dan ah sawisel tur an neih loh thu leh lungawithlak an tih thu an tarlang a ni.
Attachment
- Loading attachment...
