No.2482/2021-2022

Aizawl the 5th October 2021: 4-Tuirial (ST) Assembly Constituency Bye Election neih tur a inpuahchahna kal zel ah mawhphurhna hrang hrang latu tur Nodal Officer-te chuan an team member-te hnenah a tul angin Training an buatsaih mek zel a. Vawiin pawh khan Pu Lalmuan Puia, Nodal Officer, Election Model Code of Conduct chuan inthlanna felfai kalpui a nih theih nana hriattur pawimawh inzirtirna hun, DC Conference Hall, Kolasibah a nei.

Pu Lal Muanpuia chuan Model Code of Conduct hnuai a inkaihhruai dan tur chu Kolasib district pum a zawm tur a nih thu sawiin hmasawnna hna kalpui chungchangah hma thar lak a rem rih dawn loh thu a sawi a, chutih rual chuan hna kal lai erawh kalpui chhunzawm tur a nih thu a sawi. Sawrkar hnathawkte mawhphurhna hrang hrang, an tih tur leh tih loh tur inhrilhhriatna neiin MCC bawhchhiatna avanga ECI-in hma a lo lak tawh dan te a tarlang bawk a ni. Model Code of Conduct chu Political Party hrang hrangten vote an zawnna kawnga hma an laknaah intluktlanna a awm theih nan leh vote thlaktu turte pawhin duhthlanna rilru fim tak pu chunga an hman ngei theihna turin, inthlanna felfai leh langtlang siamna kawnga inkaihhruaina pawimawh tak a nih thu sawi a ni bawk.

Vawiin MCC Training-ah hian Sector Magistrate, Magistrate for Flying Squad and Static Surveillance Team, Video Surveillance Team, Video Viewing Team leh Liaison Officer to Election Observer-te an tel a ni.