No.2481/2021-2022

Aizawl, the 5th October, 2021 : Vawiin khan Irrigation & Water Resources Department Minister Pu C. Lalrinsanga chuan IWRD Office-ah JICA Covid Aid hnuaia hmalakna, Video Conference System Set hlanna hun a hmang.

Minister Pu C. Lalrinsanga chuan JICA kaltlanga IWRD hmalakna chu lawmawm tiin thawktu thahnem ngai tak tak te hnenah lawmthu a sawi a. JICA kaltlangin Japan mithiamten Mizoram chhungah hma an lakna hrang hrang zingah technology transfer chu a pawimawh lai leh kan mamawh lai a ni, a ti a. Video Conferencing hmanga central ministry te nena thu leh hla a inbiak tawnna awlsam zawk neih theih bakah vawiin a video conferencing system hlan te hi state leh inter-district inlaichhinna ti tha leh zual tu, Covid-19 in min chenchilh chhunga tangkai lehzuala ram tan leh mipui tana hman a nih theihnan a dawngtute hnenah duhsakna a hlan a. Information Technology chu loneitu, kut hnathawktute hmasawnna thlentu ni zel se a tih thu leh sawrkar pawhin mobile app hmanga thlai chi tha (quality seeds) chungchang inzirtirna te, thlai chi theh hun leh pest management inzirtirna leh thlai eichhetu, pest hriat theihna leh mithiamte rawn theihna kawnga hmalak la zelin, tih hmasawn zel pawh a tum a ni, tiin a sawi.

Video Conferencing System Set 25 chu Agriculture Department hnenah Set 9, Horticulture Department hnenah Set 7, Land Resources, Soil & Water Conservation Department hnenah Set 5 leh Irrigation & Water Resources Department hnenah Set 4 hlan a ni a. Set pakhat ah hian Smart TV, Camera, CPU leh Microphone zel a awm a ni.

He hun hi IWRD Secretary Pu J.Hmingthanmawia'n a kaihruai a, JICA TCP chungchang report Chief Engineer Pu Lalrotluanga hnen atangin ngaihthlak a ni.