No.2480/2021-2022

Aizawl, the 5th October, 2021: Vawiin khan Mizoram Legislative Assembly Speaker Pu Lalrinliana Sailo chuan Electoral Politics in Mizoram (1972-2019), Dr Joseph C Lalremruata, Mamit College Assistant Professor ziak chu Assembly Secretariat Common Recess Room-a programme buatsaihah a tlangzarh.

Pu Lalrinliana Sailo chuan Political Science lama mithiamin Zofate tana ro hlu la ni tur, zirlaite chhawr tangkai theih tur leh zirbingna kalpui duh te tan pawha chhenfakawm, lehkhabu rotling a ziak chu lawmawm a tih thu a sawi a. Saptawnga ziak a nih avangin ram chhung mi te mai bakah ram pawna saptawng hmangte tan pawh tangkai thei tur lehkhabu a ni a, a hlu hle a ni, a ti. Speaker chuan ram a veizia sawiin Mizoram hmasawnna tur hian budget siam kawngah leh a bulthuma ruahmanna duan (planning)-ah hma kan sawn a ngai hle nia a hmuh thu he hunah hian a sawi a. Ram hmasawnna turin mi tute pawhin mawh kan phurh tih hriaa, ram kan vei tak tak a tul a ni, a ti bawk.

Lehkhabu tlangzarh programme hi Dr Lalsangzuala Khiangte, Associate Professor, Govt. Aizawl College chuan a kaihruai a. Pu Lalmalsawma Khiangte, Asst Professor, Govt. Aizawl College chuan lehkhabu thlirlawkna hun a hmang a. Lehkhabu ziaktu Dr Joseph C Lalremruata bakah kalkhawm te hnen atangin thusawi ngaihthlak a ni bawk.