No.2479/2021-2022

Aizawl, the 5th October, 2021: Vawiin khan Pu K. Vanlalvena, Honourable MP, Rajya Sabha in SAGY Model Village atana a thlan N. Mualcheng Community Hall ah SAGY Model Village hawnna leh SAGY chungchang inzirtirna Campaign buatsaih a ni a. Pu Kumar Abhishek, IAS, DC, Serchhip chu khuallian a ni.

Khuallian chuan, Pu K. Vanlalvena, Honourable MP in N. Mualcheng khua SAGY Model Village atana a thlang chu lawmawm a tih thu a sawi a. Model Village hmalakna hrang hrangte a hlawhtlin theih nan thil pawimawh pathum a awm tih sawiin, chungte chu; a bulthut zirchianna rintlak (baseline survey), zirchianna dika innghat Village Development Plan tha leh chung Plan te a hlawhtlin ngei theih nana hnathawh zui a ni, a ti a. Heng thil pawimawh pathumte hi Line department zawng zawngten theihtawp chhuaha bawhzui tur leh thawhhona tha tak nena engkim kalpui turin a chah a. Lo tih ve theih a neih apiangte theihtawp chhuahin a lo bawhzui ve zel thin dawn a, he Model Village hi hlawhtling takin a kal ngei tur a ni, tiin SAGY model village hi a hawng a ni.

Pu Vanlalhruaia, Head Faculty, DPRC, SIRD&PR chuan SAGY Model Village chungchang sawifiahna a nei a. Model Village chu Pu Mahatma Gandhi duhthusam anga thingtlang khaw inenkawlna kalpuina a nih thu sawiin, duhsak bik tura khaw thlan chhuah nilovin inkaihhruaina dik, langtlang leh thawh hona tha bik vanga entawntlak khua ni tura thlan a ni zawk a ti. Amaherawh chu Central sawrkar hnuaia Scheme hrang hrangte chu heng SAGY Model Village te tan hian ngaihpawimawh hmasak thin tur anih avangin SAGY Model Village nih chu kawng tinrengah a hlu hle a ni, a ti bawk.

SAGY Model Village hawnna hi Pu H. Lalhruaitluanga, MCS, Charge Officer, SAGY in a kaihruaia, line department hrang hrang aiawhten thusawina hun an hmang a. Naktukah chipchiar zawkin SAGY leh a kaihhnawih hriattur hrang hrangte inzirtirna buatsaih zui leh a ni ang.

N. Mualcheng ah hian tunah chhungkua 305 awmin mihring 1686 an cheng mek a ni.

SAGY Model Village hawnnaah hian Pu Asvin Chandru. A, IAS, SDO, N.Vanlaiphai, Pu Tlangtimawia Zote, DAO, Pu. Vanlalhruaia, Head Faculty, DPRC bakah line department aiawh officials te, sawm bik khawtlang mipuite an tel a, Pu F. Lalbiakdika, VCP, N. Mualchengin lawmthu sawiin inkhawm a khar a ni.