2049/2022-2023
Aizawl, 23.09.2022: Science Promotion Wing, SCERT, Mizoram leh NCERT, New Delhi tangkawp chuan vawiin khan State Level Science, Mathematics and Environment Exhibition 2022 vawi 41-na chu Govt. Chaltlang HS & HSS ah buatsaihin a ni a. Science leh Mathematics zirna tih hmasawn nan Science Exhibition hi kum 1978 atang khan a lo buatsaih thin a. Science Exhibition atang hian mithiam thahnem tak an lo chhuak tawh a ni.

Science exhibition hi Stage-2 in- State level leh National level-ah buatsaih thin a ni a. State level a ti tha te hi National level ah an tel thin a ni. Kumin State Level Science, Mathematics and Environment Exhibition Theme chu “Technology and Toys” tih a ni a. Theme behchhan hian Mizorama sikul chi hrang hrang ten model siamin an rawn phochhuak a. Mizoram chhunga District 5 te atangin school hrang hrang ten model/exhibit 27 an pho chhuak a ni.

Khuallian Dr. Alice Lalchhandami Fanai, Joint Director, SCERT chuan thusawiin, Covid 19 hripui vanga harsatna kara Science Exhibition buatsaih theih a ni chu lawmawm a tih thu a sawi a, National Education Policy 2020 in a ngaih pawimawh em em thiamna tluantling leh huapzau neih theihna chu Science Exhibition hi a nih thu a sawi a, naupang te ngaihtuahna/suangtuahna leh zirtirtu te thiamna luang khawm a taka chantirna pawimawh tak a ni a ti.

Exhibition neih chhung hian Science zirtirtu te leh naupang te tan One day Seminar on Popularization of Science neih a ni a, thupui pawimawh tak, “Scientific Academic Institute of India” hmangin Pu Zothansiama, Asst Prof, Dept of Zoology, MZU in hun a hmang a, Pu F. Lalliansanga Deputy Director (SPW), SCERT in “INSPIRE Awards MANAK Scheme” thupuia hmangin hun a hmang bawk.

Lawmman latu te chu:
1st Rank: Priscilla Lalmawikimi, St. James School, Chawlhmun, AizawlName of Exhibit - "Production of Biodiesel"

2nd Rank: Joel Lalrinpuia, Govt. Central HS, College Veng, AizawlName of Exhibit - "Hydraulic System Earth Mover"

3rd Rank: Laldinpuii Bethel, Mission School, ChamphaiName of Exhibit - "Clinometer"