Vawiin khan 4th IR Bn Mamit Luangpawl-te chuan a mamawh apiangte hman turin Mamit District Hospital tan thisen an pe.

Thisen pek hma inkhawm tawi neihah Pu Lalthakima, Dy Commandant chuan nimina neih zawh tak Mamit Zone Football Tournament-ah 2nd Division-a Champion Team an nih lawmna ni pahfawmin midangte tana luangchhuak tura thisen pe an nih thu a sawi a. 4th IR Bn te chu mipa rual awmkhawm an nih avangin mihring mize hrang hrang nei an ni a. A tha zawng nilo, a chhe zawnga midangte hriat an lo ni fo tawh thin maithei a, chuti chung chuan midangte tana malsawmna ni tura luanchhuah chu an tum ber pakhat a nih thu a sawi. Infiamna hmanga an taksa hriselna ngaihpawimawh deuh deuh chu an hmalam hun atana hma an lakna tur a nih thu a sawi bawk.

Dr. Hmingthansanga, Blood Bank Officer/ Medical Officer(incharge) chuan midangte tana malsawmna ni tura thisen pek chhuah chu kan hriselna atan a hlauhawm loh thu sawiin, 4th IR Bn te chu tum dangah pawh Mamit District Hospital tana thisen an lo pek thin tawh thu sawiin thisen mamawhna a san pawha an va pun mai thin thu a sawi a, tun tuma Champion lawmna ni paha Mamit Hospital tana thisen an pe chu District Hospital aiawh pawhin lawmthu a sawi a ni.

Vawiin thisen pekna hun Mamit District Hospital Blood Bank-a thawktute hian 4th IR Multipurpose Hall-ah kalchilhin thisen petute hi an vaiin mipa 31 leh Hmeichhia 2 an vaiin mi 33 an ni.