Nimin khan Zemabawkah Chief Minister Pu Lal Thanhawla chuan Border Roads Organisation (BRO) din champha vawi 58 lawmna a hmanpui a. Chief Minister chuan BRO in an din champha vawi 58-na an thleng chu lawmawm a tih thu sawiin Project Pushpak chu Mizoram kawng that zawk nana hna an thawhnaah fakawm a tih thu a sawi a. Project Pushpak leh mizo mipuite chu ram hmasawnna atana an thawhho zel a beisei thu sawiin BRO chu an kal zelna turah duhsakna a hlan nghal bawk a ni.

BRO din champha hi kar khat chhung lawmna hun neih niin sports competition, cultural programme, mela leh a dangte May Ni 3-7 chhung khan huaihawt a ni.

BRO hi kum 1960 khan Prime Minister Pandit Jawaharlal Nehru chuan a din a. India rama hmun tlawh harsa tak takah kawng hrang hranga hmasawnna bakah remna leh muanna a awm theih nan an thawk thin a. Project Pushpak hi BRO hnuaia awm niin kum 1967 khan kawng siam lama hmalak a nih theih nan Aizawlah din a ni a. Project Pushpak hian Aizawl bakah Mizoram hmun hrang hrangah inkalpawhna kawng 3600 km chuang an siam tawh bawk a ni.