Thla thar December ni 7 - 11, 2009 chhunga 5th National Youth Women Boxing Championship chu Aizawl, Mizoram-ah nghah a ni dawn a. Hemi chungchang ngaihtuah hian vawiin chawhma khan Championship Organising Committee chu an Patron Mizoram Chief Minister Pu Lal Thanhawla hovin CM’s Conference Hall-ah meeting hmasa ber an nei a ni.

 

 

He meeting hian hlawhtling taka he Boxing Championship thlen a nih theihna atana thil tul te chipchiar takin an sawiho a. Chief Minister Pu Lal Thanhawla chuan Organising Committee-in tul leh mamawh a tih apiangte chu sorkarin a tihlawhtling zel dawn a; Mizo thalaite-ah hian talent tam tak a awm a, chutiang talent-te haichhuaka chawm seilian tur chuan keimahni tualzawlah ngei kan thalaiten state level-te, regional level te leh national level intihsiakna tam zawk an hmachhawn a tul a. Chuvang chuan hetiang infiamna liantham thlenna remchang kan neih apiang chu phur taka thlen zel kan tum tur a ni a; sum leh hmunhma lamah duhthhu la sam lo mahila Mizoram sorkar chuan changtlung zawka thalaite infiamna tur a ngaihtuah chhunzawm zel dawn a ni, a ti. Chief Minister chuan infiamna kawngah pawh ram aiawh tur meuh chuan induhsakna leh inthlei bikna a awm thin a, nakin hunah pawh a la awm zel ang. Nimahsela kan thalaite zingah ram aiawh tlak kan awm a nih phawt chuan an hmakhua sut en sak hi sorkar chuan a tum tlat a, kan infiammite thlavang hauh kawngah sorkar chu a hnungtawlh ngai lovang, a ti. Pu Lal Thanhawla chuan Mizo thalaite infiamna lama hmasawnna chu Mizo hnam chawisangtu leh hmingthatu a nih thu sawiin, hetianga infiamna peng hrang hranga Mizo thalaite hming a lo lang thin hian sorkar leh Mizo mipuite min cho phurin min chawimawi a ni, a ti bawk.

5th National Youth Women Boxing Championship hi 7 - 11 December, 2009 atan hian Satanda Company (Patiala) atangin Boxing Ring 2 chah chhuah mek a ni a. Championship hi Zarkawt Recreation Basketball Court-ah neih tum a ni a, ruah a sur chuan SAI-ah insawn tur a ni ang. India state hrang hrang atangin hmeichhe boxer thlanchhuah 130 vel rawn kal tura beisei an ni a, anni rual hian Ring Officials 50, Manager/Coach 60, Indian Boxing Association hotu 15, doctor 4, National Youth Commission member 4 leh Selection Committee hotu 5 an rawn kal tel ve dawn a ni. Championship-a inel turte chu Govt. High School, MacDonald Hill-ah thlen tir an ni vek ang.

5th National Youth Women Boxing Championship Organising Committee puipa tura ruatte chu:

PATRON                -    Pu Lal Thanhawla, Chief Minister
Organising Chairman        -    Pu Zodintluanga, Sports & Youth Services Minister
Organising Vice-Chairman    -    Pu S. Laldingliana, Parliamentary Secretary, S&YS
Working Chairman            -    Pu Nghaklianmawia, Secretary, S&YS
Vice-Chairman            -    Pu Zoliana Royte, Director, S&YS
Organising Secretary        -    Dr. Zorammawia, President, MABA
Organising Jt. Secy.        -    Py R. Biakliana, Secy. Gen., MABA an ni.