67th India Republic Day chu vawiin khan GSA Playground Mamit-ah ropui taka hman a ni a, Mamit Bawrhsap Pi Lalbiaksangi chu khuallian niin hnam puanzar a pawtpharh.

Pi Lalbiaksangi, Mamit Bawrhsap chuan India ram rorelna tha neia ram zalen, muanawm leh hmasawn kan nih theihna tura Danpui (Constitution) tha tak duangtu te zahna chibai a bukin, Republic Day hmang tura kalkhawm zawng zawng te chibai a buk bawk. Dan tha leh ropui hnuaiah hmasawnna lamtluang zawhin kan thang chho zel a ni tiin, Mamit district pawh sorkar hmalakna hnuaiah a thang zel a ni a ti. Pi Lalbiaksangi chuan kum kalta chhunga Mamit district chhunga sorkar hmalakna hrang hrang te hetiang hian a tarlang a; Sorkar flagship programme NLUP chu chaktaka kalpui zel a ni a, Mamit District a Line Department 8 kaltlangin chhungkaw 11, 393 hnenah tanpuina pek an ni tawh. MSDP, MLALADS leh MPLADS te hmangin khaw hrang hrangah hmasawnna hna thawh a ni a, khuarel chhiatna tawk chhungkua erngemaw zat hnenah DM&R Department kaltlangin tanpuina pek an ni a. Mizoram a Oil Palm tharchhuah tamah Mamit District chu a thar chhuak tam ber niin, kum kalta khan 1797.25 metric ton thar chhuah a ni. Sorkar Department te leh khawtlang hruaitute thawhhona avangin district chuan hma a sawn zel a, boruak muanawm tak hnuaiah Village Council inthlan April 30, 2015 khan neih a ni a. RMSA hnuaia school 12 sak a ni tawh a hei bakah hian SSA hnuaiah hnam tlem zawk te tan Residential Hostel 2 din a ni a, Football Academy Centre 8 din mai turin ruahmanna a awm bawk. Environment & Forest Department chuan Forest Revenue Rs.13.94 lacs an sorkar kum kal lai mekah an chhung lut tawh a, ramngaw humhalh lama inzirtirna neih thin a ni bawk. District mipui te an hrisel zel theih nan Health & Family Welfare chuan hma a la reng a, Malaria ti tlem tura beihpui thlakin In 23,621-ah DDT kah a ni tawh. Local Administrative Department hnuaiah khaw thlan bik 26 te hnenah Solar street light 5 theuh ZEDA kaltlangin pek chhuah a ni. March 2016 atanga hman tan tur Food Security Act hmang mai thei turin Mamit District a inpeih tawh tih District Bawrhsap chuan a tarlang a. Heng bakah hian sorkar department hrang hrang te hmalakna a tarlang bawk.

Vawiin Republic Day lawmna-ah hian Parade contingent 13 awmin, armed contingent 1 leh unarmed contingent 11 leh pipe band pakhat an awm a, Parade Commander hi S.I H.Lallungtiawia a ni. Parade contingent titha lawmman sem niin, 1. St.Francis of Assissi School Boys Contingent, 2. JNV School leh 3. New Diamond School Contingent te an ni.

Ministry of Home Affairs bultum a School Education Department leh DC Office Mamit te tangkawp buatsaih Mamit District Level Essay writing Competition for school students “National Integration and Communal Harmony” tih thupui hmanga neih a lawmman la te 1. Lalchhantluangi, Cls-IX St.Francis of Assissi High School, 2. Lalruatfamkima Pachuau, Cls X, Mamit High School-II leh 3. Esther Laldingngheti, Cls-IX Govt. Mamit High School te leh Consolation Prize dawngtu mi pahnih hnenah lawmman Khuallian hian a hlan bawk.

Republic Day lawmna GSA Playground a neih zawh hian sawm bik te tan thingpui ruai Tourist Lodge, Mamit- ah neih a ni.

Mamit bakah hian district chhunga SDO (Civil) leh BDO te thutchilhna khuaah Republic Day hi hman a ni bawk.

Vawiin Republic Day lawmna pual hian District Bawrhsap hian District Hospital a damlo awmte leh Shelter Home a naupangte a tlawh bawk.