Ram chhung leh state chhung hmun dang rualin vawiin khan Republic Day vawi 67-na lawmna chu urhsun takin Tumpui Playground, Kolasib ah neih a ni a, khuallian Kolasib DC Pu H. Lalengmawia, IAS chuan hnam puanzar pawt pharhin Parade Contingent 16 te zahna chibai a changlet a ni.

Pu H. Lalengmawia chuan he huna mipui kalkhawm leh Kolasib District mipuite te chu Republic Day duhsakna hlanin kum khat chhunga Kolasib District-a Department hrang hrang ten mipui rawngbawlna kawnga an hmalakna leh hmasawnna an neih te a thusawi ah hian a tarlang a. Ram Danpuiin intluktlang taka mitin chanvo leh dikna a pek thusawiin Ram Danpui hnuaia zalenna kan neih hi a vanneihthlakin a thlamuanthlak a ni a ti a. Mipuiin Sawrkarah beiseina nasa tak an nei a chu beiseina tihhlawhtling tur chuan sawrkar hnathawkte chu inpekna thuk zawk leh sang zawk nen kan thawh a ngai a, in chhem alh tawn ila, kawng engkima hmahruaitu District nih tum ila, tichuan Zoram mawi leh nuam kan siam thei ang, a ti.

DC chuan Sawrkar flagship programme NLUP hnuaia Phase zawng zawng hnuaia Kolasib District chhunga beneficiaries 11372 an awm thusawiin Line Department te leh beneficiaries te an tang nasa in hma lakna leh hlawhtlinna duhawm tak tak a rawn lang chho zel a, Kolasib District chhunga kuthnathawktu leh loneitu te hi District danga kuthnathawktu leh loneitu te tan entawntlak in nih kan duh a, chumi atan chuan theihtawpa tan la turin ka chah duh che u a ni, a ti bawk.

Dan leh thupek kenkawhna lamah Police te chuan ngawrh takin boruak him leh muanawm hnuaiah Kolasib mipui tan an thawk zel a tiin nikum January atanga December thla tir lam thleng khan thubuai 273 ziahluh a nih thu leh chung zinga thubuai 209 te chu chinfel a nih thu a sawi a. Agriculture Department chuan oil palm chin lamah tan an lak nasat avang leh hlawhtlinna an neih avangin Kolasib District chu 'Oil Palm District' tih hial khawpa hriat lar a nih thusawiin Kolasib District a oil palm tharchhuah chu 2015 khan kum hmasa lam enin a let in a pung a ni, a ti a. 2015 a oil palm tharchhuah chu 1825.522 Metric tonne niin 2014 a tharchhuah chu 982.647 Metric tonne anih thu a tarlang. Horticulture Department chuan Kolasib District a thlai leh thei chingtu te thiamna tihpun nan leh an mahni kawng hrang hranga pui turin nikum December khan Centre of Excellence Thingdawl chu hawn a nih thu a sawi. Animal Husbandry and Veterinary Department chuan ran vultu te tan nasa takin hna an thawh thusawiin Kolasib District atangin District danga talh turin kartin vawk 20 atanga 30 vel hralhchhuah thin thu a tarlang. Fisheries Department chuan sangha khawi chi dang Cage Culture an kalpui thu sawiin khaw 3 chhunga chhungkaw 96 ten hei hi an kalpui mek a, an tharchhuah pawh quintal 515 a tlin tawh thu a sawi bawk.

District mipuite hriselna dinhmun siamthat leh chawikan kawngah District Hospital leh Chief Medical Officer, Kolasib District te chuan theihtawp chhuahin hma an la zel a ni a ti a. Damdawiin leh sub-centre ah nau chhar te a pung a, Infant Mortality Rate leh Maternal Mortality Rate te a tlahniam a, naupang a tam thei ang ber hri venna hrang hrang pek an ni a, puipunna hmuna zuk leh hmuam khuahkhrihna dan COPTA chu khauh taka kalpui zel a ni, a ti bawk.

Ziak leh chhiar thiamna tehfung Literacy Rate a san zawk theih nan District chhunga ziak leh chhiar thiam lo te thiam tir an nih theih nan Education Campaign hmanga tan lak tum a nih thu DC chuan a sawi a. Hemi atan hian Kolasib District Illiteracy Survey 2015 buatsaih a ni a, he survey ah hian ziak leh chhiar thiam lo mi 2101 chhinchhiah niin heng zinga a tam thei ang ber chu ziak leh chhiar thiam tir tum a ni, a ti bawk. Mid Day Meal scheme hnuaia sikul 180-a zirlai naupang 12514 chu chhun chaw pek chhunzawm zel an nih thu a tarlang bawk.

Department hrang hrangte kum kalta chhunga Sawrkar sumbawma sumpai an thehlut zat tarlangin Taxation Department in Rs. 4,37,11,220 chhiah a hmu tawh thu leh Transport Department in Rs. 1,91,29,976; Excise and Narcotics Department in Rs. 65,35,245 leh Environment & Forests Department in Rs. 40,70,437 Sawrkarah revenue an chhunluh tawh thu te DC hian a sawi a ni.

Power & Electricity Department chuan Restructured Accelerated Power Development Reform Programme (RAPDRP) (Part-A) atan Kolasib hi Pilot Project a nih thu sawiin Computerised Billing tih zawh tawh a ni a. RAPDRP (Part-B) atan Kolasib town area huam chhunga Power line siam that hna leh transformer dah belhna tur hma lak tan a ni tawh, a ti a. Cheng nuai 632.93 senga siam 2.5 MVA, 33/11kv Sub-Station, Saiphai hawn thuai beisei a nih thu te a sawi bawk a. Department dangte hmalakna hrang hrang pawh DC chuan a tarlang bawk a ni.

Vawiina Republic Day Ceremonial Parade ah hian Contingent 16 an awm a, heng zingah hian Ex-service contingent tiamin uniformed contingent 6 an awm a, School Contingent 10 (DIET contigent huam telin) an awm bawk a. Ceremonial Parade-a Uniformed Contingent zingah Mizoram Excise & Narcotics Contingent chu pakhatna niin NCC Girls St. John's HSS contingent chu pahnihna leh NCC Air Wing Diakkawn High School contingent chu pathumna an ni. School Contingent zinga pakhatna chu JNV Thingdawl niin pahnihna chu St. John's HSS leh pathumna chu Hmar Veng High School contingent te an ni. Vawiin Republic Day lawmna ah hian Department 14 ten mipui rawngbawl kawnga an hnathawh te chu Tableau hmangin an pholang bawk a ni.