Vawiin hi India Republic Day vawi 67-na a nih angin ram chhung hmun dangte rualin Hnahthial-ah pawh HBSC Ground No-I-ah chawhma dar 10:00-ah Khuallian Pu Kannan Gopinathan, IAS SDO (C) hovin ropui taka lawm a ni a, khuallian hian Hnam Puanzar pawtpharh in School Parade Contingents 12 te hnam puanzar chibai buk a chhang let a ni.

Khuallian Pu Kannan-a chuan thu sawiin, Republic Day lawmtu mipui kalkhawmte chibai a buk a, “kum 1950 vawiin ni ang hian India ram chu mitinte intluk tlanna leh rorelna dik a awm theihna tur atan Soveregin Democratic Republic nihna hlan a ni a, chutiang a dikna leh intluk tlanna kan neih theihna tur atan kan ram danpui hian min humhalh tlat a ni” a ti a, Hnahthial bial chhunga Department hrang hrang hmalakna leh hmasawnna te a tarlang bawk a, SBI in Hnahthial-a ATM an dah avangin lawmthu a sawi a, “Hnahthial hi Jeje Lalpekhlua vangin India ram news-ah kan hming chuantir a ni tawh a, he a hming thatna hian naupang zawkte a cho phur hle a, tunah pawh India National Team-ah Hnahthial naupang pahnih Joseph Vanlalhruaia leh Jeremy B. Laldinpuia te an awm mek a ni” a ti bawk.

Khuallian chuan Agriculture leh a kaihhnawih thilah department te nen thawk hovin Free SMS buatsaih a nih thu leh loneitu mi 650 hnenah SMS thawnchhuah a nih thu sawiin hei hian a tum ber chu tih dan tha an hriat theihna tura loneitute kawng kawhhmuh a, tih tur leh tih loh turte, sorkar hmalakna hrang hrang a hun taka an hriat theih nana duan a ni, a ti a, loneitute'n an thar chhuah hralhna tha an neih theih nana tan lak a huam thu te, loneitute thlai chin tur leh an thlai chin engtia enkawl tur nge tih te an hriat theih nan a puih thei a beisei thu a sawi bawk. Pu Kannan-a chuan “Lalnu Ropuiliani chenna thin ram kan nih avang te, Saikuti leh Chawngvungi te tuallenna rama awm kan nih avangin Hnahthial leh a chhehvel te hian hnam ziarang thilah pawh pawimawhna kan nei a, heng avang te hian kumin-ah Chapchar Kut ropui taka lawm tuma hmalak mek a ni” a ti.

Republic Day lawmnaah hian KVK Hnahthial in nikum a, National Level Exibition cum Seminar on Plant Protection Variety on Farmer Right (PPVFR)-a 3-na an nih lawmpuina thuziak khuallian hian a hlan bawk a ni.