Tukin zingkarah khan South Asian Games vawi 12-na, Guwahati and Shillong khawpuia neih tur, Meichher chu Chanmari atanga Treasury Square inkarah tlan pui a ni a. He hun hi Sports & Youth Services Minister Pu Zodintluanga leh Parliamentary Secretary Pu Hmingdailova Khiangte-te bakah sawrkar official thahnem tak leh sport lama hnuhma nei tha tak tak ten an hmanpui. 12th South Asian Games Torch Relay bul tanna hi Chanmari Kawnah neih a ni a. Khuallian Pu Hmingdailova Khiangte chuan South Asian Games in a tum ber chu remna leh muanna a ni tia sawiin, “South Asia mai ni lo, India hmarchhak state-te hi remna leh muanna mamawh em em tu kan ni,” a ti bawk. Thu a sawi zawhah 12th South Asian Games Meichher chu South Asian Games Official-te hnen atanga dawngin Sports & Youth Services Department Director, Pu Zothanmawia hnenah a hlan a, Meichher chu tlanpui nghal a ni.

12th South Asian Games Meichher chu Chanmari leh Tresurry inkarah Sawrkar mipawimawhte leh infiamna lama hnuhma nei tha, mi 28 laiin an tlanpui a. Mipui thahnem takin tawiawm bawk.

12th South Asian Games Torch Relay kharna hun hi Secretariat Annex II tualzawlah neih a ni a. He hunah hian khuallian Sports & Youth Services Minister Pu Zodintluanga chuan Meichher chu lo dawngsawngin South Asian Games Official-te hnenah a hlan let leh a ni. Hlan let paha thu sawiin Pu Zodintluanga chuan 12th South Asian Games dawngtu tur state pahnih, Assam leh Meghalaya chu duhsakna a hlan nghal bawk.

South Asian Games hi Asia chhim lama awm ram pariat:- Afghanistan, Bangladesh, Bhutan, India, Maldives, Nepal, Pakistan and Sri Lanka-te sport discipline hrang hranga an inelna tura buatsaih a ni a. 12th South Asian Games official mascot atan Tikhor, samakno-te, harh leh thatho tak thlan niin Bhupen Hazarika hlaphuah ‘Ei prithivi ekhan krirangan/krira hol shantir prangan’ (Khawvel hi khelmual a ni a, infiamna chu remna leh muanna entirna a ni) tih chu Theme Song atana thlan a ni bawk.