Mizoram Table Tennis Association (MTTA) buatsaih March ni 7-9, 2013 chhung awh tur Inter-District Table Tennis Championship vawi 6-na chu vawiin khan Sports Minister Pu Zodintluanga’n Kulikawn Indoor Stadium-ah a hawng.
He Championship hawnnaah Sports Minister chuan Mizoram sorkar-in ‘Catch Them Young’ programme chu kum 3-4 lai a kalpui tawhah sports-ah hmasawnna namen lo hmuh tur a awm a, Mizo infiammite chu rampum leh khawvel huap pawha khel pha an tam sawt hle chu a ropuiin a lawmawm hle a ni, a ti. Table Tennis bikah hun reilote chhungin player-ten hma an sawn chak em avang leh Mizoram tan hmingthatna namen lo an siam avangin kumin chhung ngeiah Kawltheihuan, Mission Veng-ah Table Tennis Hall sak tum a ni, a ti. Kum 2016-a Olympics tinzawna hmalak mek ‘Vision 2016’ thlirin archery, badminton, boxing, hockey, judo, table tennis, taekwondo leh weight-lifting-ah beihpui thlak a ni dawn a, karleh mai hian a hawnna pawh neih tum a ni, a ti. Vawiina T.T. Championship hawnna neih rualin Sports Minister hian MTTA te tana a leisak Robot Balling Machine thar hawnna a nei nghal a ni.
Inter-District TT Championship 2012-2013-ah hian district 5 atangin team 71 an chhuak a, Individual khel turin mi 70-in hming an pe bawk a ni. Inter-District a nih angin Team hmanga intihsiakna hi neih tur a ni ang a, Category tina tel dan tlangpui chu : Cadet Boys’ Team - 13, Junior Girl’s Team - 3, Junior Boy’s Team - 18, Women’s Team - 6, Men’s Team - 6, Veteran (Above 35) Team - 9 leh Men’s Singles - 57 a ni. Ruahman lawk ang chuan he TT Championship hi March ni 9, 2013 (Inrinni) khian Mizoram Chief Secretary Pi L. Tochhong-in a khar ang a. MTTA hian an Chief Patron Pi L.Tochhong hnenah Chief Secretary a kai lawmpuina Citation an hlan nghal ang.
Thla leh April ni 8-11, 2013 hian Imphal, Manipur-ah North East Games neih a ni dawn a, heta kal tur hian Mizoram atangin Table Tennis-ah Mipa 4 leh Hmeichhia 4 thlan an ni dawn a. Tun tum Championship-a hmeichhia semi-finalist te hi kal tur an ni ang a, Mipa lamah erawh chuan Finalists te an kal thung ang.
Kumina National Level Sports chi hrang hrang 3-a Medal an lak chu MTTA chuan vawiin vek khan Synod Conference Centre-ah an lawm a ni.
