Mizoram Police Service Association (MPSA) Special Assembly chu vawiin khan Arya Mess, Khatla-ah neih a ni a. Home Miniser Pu R Lalzirliana’n he hun hi a hmanpui.

Home Minister Pu R Lalzirliana chuan sokar duhloh tak tak eirukna, hlemhletna leh a dang te an dona kawngah hian inthlanpui an hmachhawn dawn avanga inthlahdul an tum loh thu leh thil dikah chuan anmahni chhiatna tur pawh ni se kaltlangpui zel an tum thu a sawi a ni. MPS lak thar chungchang sawiin post ruak te tum khata tam tak hnawhkhah ai chuan kum tina a tahtawl zela lak chu hlawkthlak zawka a hriat thu a sawi lang bawk. Home Minister chuan Mizoram Police te tun kum reilote chhunga an hnathawhah an rintlak zia kan hmu a, thil harsa leh tih theihloh tura ngaih te pawh Police ten an chingfel ta fo mai hian an rintlak zia leh Mizo mipuite humhim tura an that tawk zia an tilang a ni, a ti bawk.

MPSA Special Assembly hi an President Pu Lalbiakzama’n a kaihruai a. An member thar mi 31 te lawmluhna hun an hmang nghal a ni.

Chawhnu lamah rorel inkhawm leh an member pension hlim mi pakua te thlahna hun an hmang a. An rorel agenda zingah chuan an service kaihhnawih chungchang thil pawimawh hrang hranga hmalak zel dan turte leh an Constitution ennawn chungchang te a tel a ni.