Chief Minister Pu Lal Thanhawla chuan vawiin khan Aizawl Hunthar Vengah Chakma House Annexe building sak thar a hawng.

Hawnna inkhawm, building kawt tuala buatsaihah Chief Minister chuan hmasawnna kan neih leh hmuh te hi kan zavaia tan a ni a, sorkarin abikin khawilai hmun emaw, a mimal ang leh pawl angin emaw tumah duhsak bik leh duhsak loh bik a neilo tiin, kan zavaia thatna tur a kalpui zawk a ni, a ti a. India ram democracy chak tak hnuaiah hnam hrang hrang te intluktlang vekin kan awm a; keini hnam tlem bikte phei chu Danpui hnuaiah humhalh bik kan ni, a ti a. Mizoram leilung fa zawng zawng te hian dikna leh chanvo inang, mawhphurhna thuhmun kan nei vek a ni, a ti a. A chibing ang leh hnam binga kal tum hi hmasawnna tithuanawp theitu a ni a ti. Keini Zorama cheng tlemte te hi a chibinga kal tham pawh kan nilo a, neitu tilru pua taimakna, rinawmna leh dikna nen kala, hmasawnna hi kan zavaia tan a ni tih kan hriat a tul hle a ni, a ti.

Chakma Autonomous District Council (CADC) hmasawnna tura DONER Ministry in thil tam tak a kalpui te Chief Minister hian sawilang bawk in, sorkar ngelnghet tak a awm a, chak zawka in kal hi kan duhsak che u in, Zoram tan inpe thar turin Chakma mipuite ka chah che u a ni, a ti.

Chakma House Annexe building sak thar hi Rs.1,44,70,635 /- senga sak a ni a. Chhawng 4 a sak niin, VIP room 4 tiamin a vaiin room 13 a awm a, tum khatah mikhual 20 thlen theihna tur a ni. Office leh reception counter a awm bawk.A building hnuai ber (basement) ah mipa leh hmeichhe tan a hrangin dormitory 2 a awm bawk a ni.

Hawnna inkhawmah hian Pu Kali Kumar Tongchangya, CEM, CADC in lawmna thachah a sawi a. Chief Minister hi Pu Zodintluanga, Minister for UD&PA, Pu N.K.Chakma, Minister of State for AH&Vety leh Pu Lalkhama, Vice Chairman, State Planning Board ten an tawiawm a ni.