Pu Hmingdailova Khiangte, Chairman Mizoram Youth Commission chuan nizan khan Sakawrhmuituai Group YMA Conference Lungmuat ah hmanpuiin, ‘Kan Zoram hi Mahni intihhlum duhna rilru te, State pawn atanga hnathawk-a lo lut te, Sawrkar-ah dik tawk lo deuh-a mahni thil report duhna rilru te hian min run mek a ni’ a ti a. Cement Mistiri, Motor Mechanic, Mutia leh Huan hnathawk tura kan awmpui te hian nakin ah Hnam tan pawi an la khawih thei a ni a ti.

Sakawrhmuituai YMA Conference Rorel chuan ‘Serkhan Bhaga Road hi Ruihhlo tawlhna kawng hman rim tak anih avangin a tih tawp dan ngaihtuah nise’ tih te; Tuirial lui kam Ram ngaw humhalh that anih theih nana hmalak te an rel a ni. Hei bakah hian Serkhan - Bhaga Road kawng laih mekah tumah uchuak taka Zangnadawmna beisei lo tur leh diklo taka Compensation lak tum an awm chuan Group YMA in chhui chiang zel rawh se tih te; Serkhan Bhaga Road kawng siamna sum tam tak tichingpentu te hremna na tak pek an phut thu te; Bukpui-a Police Out post dah tura ruahman vek tawh, Saiphaia dah anih tak avanga an lawmloh thu leh Bukpui ah ngei dah tura Sawrkar ngenna resolution te an siam bawk.

Sakawrhmuituai Group YMA ah hian YMA Branch 11 an awm a. Conference hi March 5 zan atang khan an tan a, zanin hian a tiak ang.