NITI Aayog hnuaia hmarchhak state huama 6th Schedule Areas atana hmasawnna sum hai chhuah nana project duan dan tur ngaihtuahin vawiin chawhnu dar 1:00 khan NLUP Conference Hall ah Mizoram State Planning Board Vice Chairman Pu H.Liansailova hovin sawrkar mi pawimawh te an thukhawm a ni a, meeting ah hian Autonomous District Council hotute bakah department kaihhnawih Mizoram State Planning Board, PWD, PHE, Finance, Planning & Programme Implementation, School Education, Health & Family Welfare, Agriculture, Horticulture, Minor Irrigation, Disaster Management & Rehabilitation, Geology & Mineral Resources, Soil & Water Conservation leh Sports & Youth Services Department hotu lian Secretary leh Director te an tel a ni.
Chairman Pu H.Liansailova chuan department hotu lian kalkhawmte fuihna thu sawiin Mizoram tihhmasawn nan sawrkar leh mimal ten nasa taka tan an lak mek thu te a tarlang a, rethei te chhanchhuahna sum a awm thu sawiin hna thawh dan tur leh hmalak dan tur kan chhawpsak a tul a ni, a ti. Hmanraw changkang technology sang lutuk hman kher a tul lo tiin thil tam tak tih tum lova, tih mai theih tih zung zung chuan kan ram hmel a tidanglam thei dawn a ni, a ti bawk. Ram hmasawnna tur leh rethei te chawikanna tura sawrkar hmalakna te a hlawhtlin theih nan officer te in tui tlan a ngai tiin Pu H.Liansailova chuan kan hnathawh dan leh hmalak dan phung te a tul anga kan tihdanglama kan inher rem thiam a tul a ni, a ti bawk. Sum tam tak senga ram mipui te tana sawrkarin hma a lakna kawng hrang hrangah khawi lai nge kan tlakchhamna lai hrechiang a, mipui vantlang hlawkpuina leh chhawr tangkai theih tura hma lak chhoh zel a pawimawh thu te a tarlang bawk.
Mizoram State Planning Board Member Secretary Pu P.L.Thanga chuan meeting koh chhante sawifiahin 6th Schedule hnuaia mite tana sawrkar laipuiiin sum thahnem tak a dah hai chhuah nan project rang taka duanga sawrkar laipuia thehluh thuai a ngaih thu te a tarlang a. Meeting chuan hemi rual hian Sialkal tlang te, Sinlung Hills Development Council te leh Reang Development Area te huam tela vantlang mipui mamawh uluk taka chhuta project duan ni se an ti a, vantlang hriselna inenkawlna te, inkalpawhna kawng siam te, zirna school tihchangtlunna te, mipui eizawnna kawng ngaihtuahsak te leh tul dang te ngaihtuah chunga project uluk taka siam ni se an ti a, Autonomous District Council hotu te pawhin department officer te nen inberawn chungin an Council huam chhunga an mamawh te duangin sawrkar ah thehluh thuai ni se tih te an rel bawk a ni.
