Vawiin chawhnuah khan Mizoram Governor Lt. Gen.(Rtd.) Nirbhay Sharma chuan Hero I-League season thar a khel tur Aizawl FC Club hotute leh player te Raj Bhavan a lenglut tura sawmin Circular Lawn ah thingpui ruai a buatsaih sak a. Governor chuan Aizawl FC player te leh hotute chu duhsakna hlan in hlawhtlinna ropui tak thawk chhuak tur in a fuih a ni.

Fuihna thusawitu Governor chuan Aizawl Football Club in I-League ah a vawikhatna atan an tel thei chu Mizoram tan inchhuanna tham thil ropui tak a ni ti a. India Football Club lian ber berte zingah pawh inthlahrung  lova an theihna zawng zawng phochhuak turin a fuih a. AFC tan chuan  Mizo mipui te thlawpna  leh duhsakna te a pawimawh dawn hle a sawiin an hlawhtlinna zinkawng ah tumruhna petu a ni ang a ti. “Mizo mipui te’n pawn lam nen nasa zawka indawr kan mamawh a, kan rilru inhawng zau zual zel se, hlawhtlinna nasa zawk kan la hmu zel anga. AFC pawh Mizo mipui te rilru zau zawk hawnsak tu leh kan khawvel tukverh zau zawka min hawnsak tu hmanrua pawimawh tak a nih ngei ka beisei”, a ti.  Mizo thalai ten an rilru a tumna an neih phawt chuan eng thil ah pawh hlawhtling theih turin theihna an nei tih AFC chuan a ti chiang hle a ni ti in Mizo thalai te tan AFC player chu entawn tur mi chhuanawm tak tak te an ni a ti a. Mizoram leh North East thalai te hian infiamna khawvel ah a ber nihna hauh thei tur in theihna an nei a ti.

AFC senior player te leh Under-18 I-League a tel ve tho tur AFC Under-18 I-League player te Governor hmelhriattirna hun  Technical Director leh Team Manager ni bawk Pu Hmingthansanga leh Pu Jahar Das  Head Coach( Youth Development)  an hman hnu in Pu Robert Romawia Royte, President & CEO, Aizawl Football Club in an club chungchang leh hmalakna a tarlang a ni.

I-League khel turin Aizawl FC official leh player-te chuan ni 6.1.2016 hian Lengpui atangin Kolkata an pan ang a.  Ni 9.1.2016 Inrinni khian an match hmasa berah I-League Champion lai Mohun bagan chu Salt Lake stadium-ah an tum nghal dawn a ni.

Aizawl FC te hi I-League 2nd Division 2014-15 ah champion in I-League 2015-16 khel turin an inpet tling a. 2015-16 season tan a nih veleh atangin I-League atana inbuatsaihna an tan nghal a. Head Coach atan EUFA Pro License nei Manuel Ratamero Fraile la-in, Asst. Coach-ah AFC ‘B’ License nei leh AFC ‘A’ license pek nghak mek Naga Coach N.William Koso chu an la lut a. Squad lam pawh tichak chhovin, Japanese Midfielder Yuta Kinowaki la lutin, Liberian Striker Alfred K Jaryan an chelh a. MFA buatsaih Independence Day football tournament  2015-ah champion I-League atana inbuatsaihna ngawrh taka kalpui zui zelin, Japanese Striker Atsushi Yonezawa pawh  la lut in I-League kaipuitu MPL 3-a best defender Emmanuel Chigozie la letin, I-league kal taa pathumna Royal Wahingdoh atangin Lalchhawnkima an la lut bawk. Anni bakah hian India U19 player leh an rinrawl zing a mi Lalramzauva chu an sign leh bawk a ni.

Club-in hma a lakna piah lamah Mizoram sawrkar leh MFA lamin nasa takin Aizawl FC hian Aizawl-ah ngei I-League an khelh theihna turin hma an la a. Mizoram Chief Minister hmalaknain chak takin RG Stadium, Mualpui pawh tihphuisui chhoh a ni a, AIFF pawhin Mizoram sawrkar inhuamna leh hmalakna te, MFA lam hmalaknate avangin Aizawl FC home ground atan RG Stadium, Mualpui chu an rawn pawm sak a ni.

I-League 2015-16 atana Aizawl FC Squad ah hian

Hmingthansanga – Team Manager, Manuel Retamero Fraile – Head Coach, N.William Koso – Asst. Coach, Dr. Zoramthara – Team Doctor, Dr. R.K. Zothanpuia – Team Physio, leh Anand Gurung – Asst. Manager te OFFICIALS an ni a. an PLAYERS te chu Albert Zohmingmawia, Alfred Kemah Jaryan,B. Zoramthara, Brandon Vanlalremdika, David Lalrinmuana, F. Lalrinpuia, H. Lalbiakthanga, H. Lalmuankima, Imanuel HS Lalthazuala, Lalbiakhlua, Laldampuia, Lalramchullova, Lalramzauva Khiangte, Lalruatthara, Lalthakima, R. Malsawmtluanga, Ronald Zothanzama, Soram Poirei Anganba, Thomas Lalengkima, Toky Zomuanpuia, William Lalnunfela, Yuta Kinowaki, Zothanmawia, Ricky Lallawmawma, Lalawmpuia, Atsushi Yonezawa, Emmanuel Ugochucku Chigozie leh Lalchhawnkima te an ni

Attachment

  • Loading attachment...