No.3811/2021-2022

Aizawl, the 26th January, 2022: Vawiin khan Serchhip DC Office tualah 73rd Republic Day lawmna buatsaih a ni a, Serchhip Bawrhsap Pi Nazuk Kumar, IAS chu khuallian niin hnam puanzar a pawtpharh.

Zing ni chhuah ruala sawrkar pisa hrang hranga hnam puanzar zar a nih hnuah he ni pual thilpekte Serchhip khawpuia Homes, Hospitals leh Jail ah te hlan an ni a, a lawmna pui ber hi zing dar 9:00 am ah DC Office tualah buatsaih zui a ni. Hripui laka himna danin a phut angin he hunah hian sawm bikte an kal khawm a, Lalro Digitals Cable TV Local Channel ah Live Telecast a tihchhuah a ni thung.

Khuallian, Pi Nazuk Kumar, IAS chuan, aiawh roreltu thlang thin ram kan nih theihna tura sulsutu ram hruaitu hmasate leh India danpui duangtu zawng zawngte zahna chibai a buk a, an remhriatna hlu tak zarah India ram chu khawvela mipuite rorelna ram lian ber, mitinte lenna, hnam hrang hrangte hlim tlang taka kan nun hona ram a lo ni ta a. Zalen taka mipuite nungin hmasawnna chak takin a kal renga, rorelna langtlang, felfai leh huapzo kan nei bawka; kan vannei em em a ni, a ti. Kawng tinrengah hmasawnna kan hmua Mizoram pawhin chak taka hma lam pan zela, tun hnai lawka NITI Aayog in Sustainable Development Goals lama titha state a thlannaah Mizoram dinhmun a tha hlea, Serchhip district pawh NE States zinga a titha thlan sawm zingah a lang a ni, a ti. Tun hnaia Serchhipin hmasawnna tharte a tarlang zui a. Kum kalta chhungin Police Department ten case 111 ziaklutin mi 121 an man a, Covid19 himna dan bawhchhiah mi 585 an chawi tir a ni. Infant Mortality Rate hi kum kalta chhungin 13.15 a ni a, report thehluh ni thlengin COvid19 hri kai mi 8068 awmin mi 24 in nunna an chan a ni. District chhungah Job Card 15,466 awmin tun sawrkar kum kal mekah ni 85 inhlawhna siam tawh a ni. Kumin January thla tir khan Government Serchhip College chuan NAAC Accredited A Grade a hmua, State sawrkar enkawl College zinga A Grade hmu awmchhun a ni rih a ni. Tun kum kal laiah Jal Jeevan Missions atangin khaw 22 ah hmalakna kalpui mek a ni a, kum hmasaah khaw pasarih tan kalpui a lo ni tawh bawk. PMGSY kawng hi tunhnaiah khaw pahnihah thawh zawh thar a ni a, khaw panga kawng laih mek a ni bawk. Bukpui leh Khawzawl inkar Electric hrui lian 132 Kv Line thlun thar hna tawh zawh a ni bawk a, he line hian Zuangtui leh Bukpui inkara line fel lo a awm changa harsatna kan lo tawh thinte kha nasa takin a tanpui thei dawn a ni. Kum 2019-20 chhung khan Serchhip district ah Vaimim Metric ton 3167 tharchhuah a ni a, loneitute hnen atangin Agriculture Department chuan lei khawlin AH & Vety Department ah ran chaw atan a hralh chhawng leh a ni. Tun hnaiah leilet tihzauh hna khaw pangaah thawh zawh niin ran chaw siamna khawl thar bun fel a ni bawk a, nikum December thla atang khan ran chawte hi her tan niin vawiin thlengin tluang taka kalpui a ni. Heng te bakah hian district chhunga hmasawnna hnathawh dang tam tak khuallian hian a tarlang bawk.
Tin, kum kalta chhunga faina inelnaa lawmman latute hnenah Pi Nazuk Kumar hian lawmman hlanna a nei nghal bawk.

Vawiina Republic Day lawmnaah hian Head of Offices te, NGO hruaitute, Media mite leh fai intihsiaka lawmman dawngtute an tel a, kum danga tih thin At Home Tea party buatsaih a ni lo thung.