No.3812/2021-2022

Aizawl the 26th January 2022: Tukin dar 8:00 AM khan DC Office, Kolasib kawtzawl ah sawm bikte nen Republic Day vawi 73-na lawmna hun hman a ni a, Dr.H.Lalthlangliana, Deputy Commissioner chu khuallian a ni.

Dr.H.Lalthlangliana, Deputy Commissioner, Kolasib chuan mahni a inrelbawl thei tur a India Danpui duan chhuah a nih dan leh he Danpui hnuai a rorelna chu mipui kut ah thui tak a innghah thu a sawi a. Mipui aiawha rorel tur pawh mipuiin, mipui zing atang ngei a thlan chhuah a nih dan te, Schedule Tribe-te tan a himna tur ngaihtuah a nih dan te, hmasawnna hna ruahman kawng a ngaih pawimawh hmasak tur a Directive Principle of State Policy awmte chu India khua leh tui tan vanneihna nasa tak a nih thu a sawi bawk a ni.

Khuallian chuan India Danpui hnuai a hamthatna leh chanvo tam tak kan dawn rualin khua leh tui tha ni tur a India Danpui bawkin mawhphurna hrang hrang hlenchhuak tura a phut angte chu ngai pawimawh turin kalkhawmte a chah.

Kolasib District chhunga Sawrkar Department hrang hrang kaltlanga kum 2021-22 chhung a hmasawnna hna thawhte tarlangin Vote nei thei ennawnna hnuhnung ber ah Kolasib district pum ah Voter 62,610 an awm thu a sawi a, Covid-19 Vaccine 1st dose la tawh chhinchhiah zat hi mi 51,391 a tlin tawh thu a tarlang bawk. Ei leh bar a mipui kan intodelhna tur a Agriculture, Horticulture, AH & Vety, KVK leh ICAR hnathawh dan tlangpui sawiin PMKSY hnuai ah leilet 100 Hectare siamna tur kalpui mek a nih thu te, Tomato leh dawnfawh hlawk zawk a chin dan kalpui a nih thu te leh Dragon Fruits thahnem tak thar chhuah a nih thu a tarlang bawk a ni.

Kolasib district chu State thenawm nen ramri thui tak nei District a nih angin ramri luhka hrang hranga Hri kai endik hna kalpui a nih dan leh Police department thawhrimna avanga ramri venhim hna thawh a nih dan te, Dr.H.Lalthlangliana chuan sawiin Sawrkar department hrang hrang thawhhonaah lawmthu a sawi a. NGO, khawtlang hruaitute leh Media lam a thawktute inpekna chu ropui a tih thu a sawi.

Deputy Commissioner, Kolasib chuan hri kai hmuhchhuah an pun belh zel avangin fimkhurna nasa zawk a kalpui a tul thu a sawi a. Hripui leng lak a invenna chu Sawrkar leh VLTF-te kut a dah mai lovin mahni chhia leh tha hriatna hmang tangkai a mahni inthunun a inveng theuh turin Kolasib mipuite a chah.

Vawiin Kolasiba Republic Day lawmna hun hmanna ah hian Sawrkar Department hrang hranga District Head of Office-te leh NGO hruaitute an tel a ni.