No.3813/2021-2022

Aizawl, the 26th January, 2022: India ramin mahni puala duan ram danpui a neih champhaphak hriatrengna India Republic Day vawi 73-na lawmna chu ram chhung hmun dangte rualin tukin khan Champhaiah neih a ni. Champhai District chhunga a lawmna pui ber hi DC Bungalow, Jericho Garden, Keifangtlang-ah neih a ni a. He hunah hian Champhai District Bawrhsap Pi Maria C.T. Zuali chu khuallian niin hnam puanzar a pawtpharh a, Republic Day thuchah a sawi a ni.

District Bawrhsap Pi Maria C.T Zuali chuan Champhai District mipui zawng zawngte India Republic Day vawi 73-na puala chibai bukin, Champhai District chu District mawi leh nuam, sik leh sa nuam tak awmna a nih thu a sawi a. Leilet siam theihna tur ram duhawm tam tak a awm nual thu pawh tarlangin, Pathianin hetiang taka District nuam leh hausa min duansak a, a chhunga cheng theia min din hi a lawmawm hle a ni, a ti a. Kuthnathawktu ten tan an lak em avangin loneitu hlawhtling tak tak Champhai District-in a nei nual chu chhuanawm a tih thu sawiin, nikum chhunga Serthlum quintal 250 thartu Pu Zamnanga, Selam; Grape quintal 100.24 thartu Pu Lianthuama, Ngur; Zikhlum quintal 140 thartu Pu Lalnunchhuanga, Samthang; Tomato quintal 177 thartu Pi Lalramnghaki, Tuipui; Hmarcha quintal 16 thartu Pu Vaikhama, Thekte; leilet buh tin 2050 thartu Pu KC Doliana, Vangchhia leh thingtlang lo buh tin 1010 thartu Pu C.Lalnghinglova, Tualcheng te chu an hminghmerha sawilangin an hlawhtlinna thinlung taka a lawmpui thu a sawi a. Loneitute hlawhtlinna chu hmuh nuam a tih thu leh a tihlawm thin thu sawiin, nasa zawk leh malsawm tlaka thawk sauh sauh zel turin a chah a, sawrkar pawhin tihtakzeta hmalate a phurpui zel dawn thu a sawi bawk.

Vawksa hrisel leh thianghlim tharchhuah kawnga District hmasawnnate tarlangin, Farkawn, Buang leh Vangchhia khua ten vawk an vulh nasat thu leh Farkawn khuain October - December, 2020 chhungin vawk man atang ringawtin cheng nuai 300 chuang an lei thu a sawi a. Champhai District chhunga Leisenzo, Khuangleng, Sesih leh Lianpui-ah te NABARD project kaltlangin TATA TRUST - NEIDA (Northeast Initiative Development Agency) chuan Apple a ching tan mek a; Hnahlan, North Diltlang leh Tualcheng-ah te FOCUS project atangin Apple chin tum a ni bawk, a ti a. Nikum November thla tuilian nasa takin leilet leh sangha dil a tichhiat sakte hnenah sawrkarin zangnadawmna a pek thu a sawi a. African Swine Fever (ASF) in nikuma Champhai District a luhchilh laia bialtu MLA pathum (3) Pu T.J. Lalnuntluanga, Dr. ZR Thiamsanga leh Pu Ramthanmawia ten an MLA Fund atanga vawk hrileng venna tur hmanrua an lei hmang leh A.H & Vety. Department, Police leh Assam Rifles te tanrualna hmanga ASF do hneh a ni thei chu fakawm a tih thu sawiin, loneitute tan Animal Husbandry, Diarying leh Fisheries-ah te KCC Loan Camp tum thum (3) tunhnaia huaihawt a ni thei chu lawmawm a tih thu a sawi bawk.

Skill Development hnuaia District hmalakna pawh tarlangin, District Skill Committee-in District Skill Road Map a siam mek thu leh, Mizoram Youth Commission (MYC) nena tangkawpin Masonry, Food Processing, Cake Baking-ah te training hlawhtling tak buatsaih a nih bakah SIRD nena tangkawpin College of Veterinary Sciences & Animal Husbandry, Selesih-ah Meat Processing training neih a ni, a ti bawk.

Champhai District-in hmasawnna hmel tam tak a hmu chho zel chu lawmawm a tih thu leh, tun aia dinhmun ropui zawk thleng thei turin Champhai District mipuiten theihna nasa tak an neih thu a sawi a. Keini lo hi District hmasawnna atana hma la tur dang an awm chuang lo tih hriain sawrkar hmalakna thlawp chungin, mahni kut ke a ding thei tur leh sawrkar puihna tello pawha ding chhuak ngei thei tura insangmar zel turin mipuite a sawm a. Hmalakna hrang hrangah ram inrelbawlna dan leh hrai ngai pawimawh reng chungin ram leh hnam tana tha ber tur ngaihtuah tel zel tur leh, dikna leh rinawmna vawng nung tlat zel turin District mipuite a chah a ni.