No.7479/2020-2021

Vawiin chawhma khan DC Conference Hall, Kolasibah Pu.Lalrinsanga Ralte, MLA hovin YMA General Conference Bilkhawthlir khuaa thlenna tur chungchanga hmalak dan tur sawihona hun hman a ni a, Dr.H.Lalthlangliana, Deputy Commissioner-in hun kaihruaiin Kolasib district-a department hotute leh 73rd YMA General Conference Organising committee-te an tel a ni.

Pu.Lalrinsanga Ralte, Serlui Assembly Constituency bialtu MLA chuan YMA General Conference vawi 73-na chu kumin October thlaa neih hman tura ruahman a nih thu sawiin hrileng avangin hmalakna tur hrang hrangte pawh kalpui a nih theih loh thu a sawi a. Hetiang boruak karah hian thawhho a pawimawh thu sawiin Kolasib district-a sawrkar department hrang hrang hotute chu hlawhtling tak a Conference neih a nih theih nan an theihna zawn theuh a hma laturin a sawm. Serlui bialtu MLA chuan Kolasib district-a sawrkar hotute chu Serlui Assembly Constituency-in hmasawnna chak zawk a hmuh theih nan an thiamna leh theihnate hmang a theihtawp chhuah thin turin a chah a, YMA General Conference inbuatsaihna kalpui mekah pawh hian an Department enkawl theuhte hmunhmate tlawhchhuak a, a tul ang anga hma la turin a chah nghal bawk a ni. 

Thutkhawmnaah hian 73rd YMA General Conference Organising Committee-ten khawmpui thlenna tur atana hmunhma thenkhat thawmthat dan turte, invenhimna kalpui dan tur leh lirthei awlsam zawk a an chetvel theihna tur atana ruahmanna an siam te chu sawiho a ni a. Heng hmalakna tur hrang hrang chhawpchhuahah hian District Headquarter-a department hotute nen a theih chin chin a rilru leh ngaihtuahnate seng hova, neitu nihna leh a thlengtu nihna rilru puchunga hmalakpui turin an sawm a ni. 

Vawiin thutkhawmna chuan Kolasib district chhunga sawrkar department hrang hrangten khawmpui thlen nana an hmalak theihnate chu February thla chhung ngei a endik a, bawhzui theih tur a ruahmanna siam nise tih an rel a ni.