No.7480/2020-2021

Vawiin khan Champhai Town Planning & Development Committee chu Law & Judicial Minister Pu T.J. Lalnuntluanga, Champhai South bialtu MLA ni bawk hovin DC Conference Hall-ah an thukhawm. He hunah hian Champhai khawpui leh a chhehvel cheibawla hmasawnna ruhrel siam dan tur  Champhai Master Plan 2031 chungchang rela inrawnkhawmna neih a ni.

Pu T.J. Lalnuntluanga chuan Champhai khawpui thanzelna tur leh nakin hun ngaihtuah chungin Champhai Master Plan 2031 chu kum 2019 atanga  tharthawh leh anih thu sawiin, hun hmasa lama hmalak tawhna chuan vawiin hun hman hi a rawn hring chhuaka, Champhai Master Plan chu dan anga siama duhtawk mai tur nilo, rahbi thar leh bul tanna a taka hman tur a ni, a ti a. Champhai Master Plan chu nakin zel tur thlira mipui hmasawnna sawrkarin a um phakloh daikhalha khairual taka Department hrang hrangte kaltlanga hmasawnna thawh theihna tura duan a nih thu a sawi a. Nikum lama peihfel hman tura ngaih ni mahse hripui leng vangin a khaihlaka, tunah erawh chak taka buaipui a nih thu sawiin, mipui leh Official-te thinlung-ah Master Plan nghahhlelhawm tak chu lang lian se a duh thu sawiin, ngaihtuahna seng tura  chahin a hlawhtlin ngei theihna tura  thawhhopuiah a sawm bawk a ni.

Law & Judicial Minister chuan Champhai Master Plan - 2031 atan Town & Country Planning (TCP) Office, UD&PA in 2020 chhunga Survey Data an lakkhawmte chu zirchianna hmasa zawhfel tawh a nih thu sawiin,  Champhai Town Area chhungah mihring 45225  an awm  mek thu leh Census 2011 aiin  12491  in a tam zawk a, kum 10 hnu 2031 ah chuan mihring 59589 awm tura chhut a ni, a ti. Champhaia mihring kan pun dan tur chhut atang hian nakin zel atan khawi lam hawi zawngin nge khua kan bawh ang tih chu ngun taka ngaihtuah tel tham a nih thu leh Leilet-phaizawl hmun humhalh zawnga khawpui than dah  pawimawh tum a nih thu a sawi bawk. Town & Country Planning Office-in zirchianna (Survey Analysis) an neih atanga a landan chuan  chhak lam (East) leh hmar (North) lam bawha than leh chhimchhak lam (South East)  Ring Road siam mek  zulzuia chenna hmun zauh chu  a duhawm ber dawn ni a a lan thu Minister chuan a sawi a. A taka hmalakna  kalpui theitu  tur India rama  Consultancy firm hmingtha tak 3 te  rawih tuma khaikhin mek an ni, a ti bawk.  Draft Master Plan for Champhai - 2031 chu  enfiah theih turin tun thla February 2021 ral hma ngeia Committee hma-a pharh tum a nih thu leh  rawtna emaw, sawi duh neite tan tunkar chhungin hun hawn a nih tur thu pawh sawiin, March 2021 ah Champhai Master Plan - 2031 chu  peihfel tum a nih thu a sawi a ni. 

Champhai District Bawrhsap Pi Maria C.T. Zuali pawhin thusawiin thangthar leh chhuan lo la awm zel turte hmakhua ngaihtuah ran chungin kan inzarpharh zel angai a, thangtharte dem kan hlawh lohna turin tun atangin  hma kan lak  tan a ngai a ni, a ti a. Champhai District hmun mawi leh sik leh sa nuam tak chu vawnhim a tul thu pawh sawilangin, a humhim leh cheithat kawngah a khaw mi ngeite kan penchhuah  angaih thu leh pheikhai rual taka pen thiam a pawimawh thu a sawi a. Sawrkar department hrang hrangte chu ram leh hmunhma an neih angte tuaihnuma uluk taka enkawl theuh turin a chah nghal  a ni.   

He hunah hian Pi R.Lalhmangaihzuali, Asst Director, UD&PA chuan Master Plan awmzia, siam dan leh hemi kaihhnawiha hriattur  tangkaite  tarlangin  Champhai Master Plan tura ruahmanna neihte a sawifiah a. Master Plan Champhai chu Urban Development Plan hnuaia siam, kum thum chhunga peihfel hman tura tih  anih thu sawiin, Mizoram Urban & Regional Development Act, 1991 dungzuia duan a ni,  a ti a. Hectare 4780.48 a zauah Town Planning kalpui tum anih thu sawiin, Leilet phaizawl humhalh leh Satellite town-te  Champhai khawpui  nen khairual taka kaltir chu ngaihpawimawh  tur a nih thu  a sawi bawk.   

Meeting-ah hian Champhai Master Plan duan chhinte uluk taka zirho a ni a. Champhai khawpui huamchhung cheibawl leh vawnhim kawnga hmalak dan turte sawiho niin, sawrkar department-te  atanga rawtna awm angte sawiho a ni bawk a. Champhai Master Plan siam mek atana rawtna leh thlen duh neite tan hun hawn chhunzawm tha tih niin,  tunkar chhung hawn nise tih a ni a.  Rawtna thlen duhte tan DUDO Champhai Pisa, CHANEM-ah thehluh nise tih a ni bawk.