No.7481/2020-2021

Vawiin khan District Disaster Management Authority  chuan  ni 2 awhtur Training, Village Disaster Management Committee leh Quick Response Team te tan New Colony MTP Office-ah a buatsaih.

Vawiin Training hawnna programme hi Pu Joel Laichi Hlychho, President, MTP, New Colony Branch chuan  kaihruaiin, Pu N. Lalzarzova MCS, SDC & Nodal Officer (DM&R) chuan  Training  hawnna thu sawiin,  he training hi Chhiatrupna laka kan inven theih nan leh a lo thlen palh hlauh pawha  awmze nei zawk  leh him zawka Tlawmngai pawl ten   chhanchhuahna hna an thawh theih nana buatsaih a ni, a ti.

Resource Person Pu VL Zuithanga, District Organiser, DM&R, chuan Khuarel chhiatrupna thleng thei te, thleng thin te leh keimahni ngei ina kan siam chhiatna  te tarlangin, chhiatna lo thlen hmaa lo inbuatsaih dan tur leh  inven dan tur  sawiin, chhiatna thlen hnu pawh a rang taka lo hmachhawn nghal theihna tura ruahmanna te, mihring a nghawng theih dan lo zir lawk te hi kan mawhphurhna a ni, a ti.Village Disaster Management Committee hi chhiatna thleng theih laka kan inven theih nan hian kan mamawh a, chuvangin Khawtin leh Veng tinah din theuh turin hma lak mek a ni  tiin, VDMC & Quick Response Team te  mawhphurhna chungchangah zirtirna a pe bawk.

Resource Person Pi Lucy Lalnunfeli, Lecturer, GHSS,Siaha chuan Landslide and Fire Prevention tih  thupuiah  hmangin  zirtirna  a pe bawk.

Resource person ten zirtirna an pek zawh hian trainees te nen sawihona hun hmangin, Trainees te hriatthiam loh leh hriatbelh duh zawhna te chhan nan leh  inhrilhhriat nan hun an hmang bawk a ni.