No.7482/2020-2021

Vawiin khan Information & Public Relations Department leh Mizoram Art Development Society tangkawpin an buatsaih Ramtuk Thla Art Workshop, 2021 ni 4 awh tur chu Pu Sangdingliana, IAS, Commissioner Secretary, Information & Public Relations Department chuan Art & Novelty Gallery, Chaltlang-ah a hawng.

Pu Sangdingliana chuan lemziak leh painting hi rilru leh ngaihtuahna puanchhuahna pawimawh tak a ni tiin artist te chu an thiamna leh ngaihtuahna te chu ram tana tangkai taka hmang turin a chah a. Hetiang Workshop buatsaih a ni thin hi artist ten hmasawnna atan an hman ngei a beisei thu a sawi a ni. 

Art Workshop hawnna hi Pu Laltanpuia, President MADS in a kaihruai a, Pi Lallianpuii, Director, I&PR chuan Art tih hmasawnna tura hrileng karah pawh theih ang anga department hmalakna te a sawi a. Artist te thiamna ti hmasawn tura hmalakna hrang hrang te sawiin tan la sauh sauh turin a chah a ni.

He Art Workshop ah hian artist 51 telin, Aizawl bakah Lunglei, Champhai, Tuidam leh Bairabi atangin artist te an tel a. Workshop hian tunkar chhung a awh dawn a ni.