Thian duh takte u, 

Kum 1950, vawiin angah khan khawvela mipui sawrkar ram lian berte zinga chhiar tel turin Danpui kan lo nei a; he Danpui hian mi tinte chu zalênna, dikna leh intluk tlànna min pek mai bakah India khua leh tui kan nihna anga kan tihtur kan mawhphurna te pawh min siam sak a, chung zingah chuan kan Danpui (Constitution) zawm, Hnam puan zar (Flag) leh hla (Anthem) te zahna lantir hi a tel a ni. Republic Day hi mi in a tihtur a hlen chhuahna ni a ni tih hriain, vawiin India Republic Day vawi 76-na, ni ropui takah hian in hun hlu tak senga he lai hmuna lo kal khawmte leh hmun hrang hranga awm Siaha District mipui zawng zawngte zahna leh duhsakna chibai ka bûk a che u. 

Kan hriat theuh angin Siaha District hi Mizorama District sawm leh pakhat zingah District upa berte zinga mi a ni a; District upa ber te zinga mi kan ni na chungin, kan population erawh a la tlem em avangin, sawrkar atanga District hmasawnna tura sum lo lut te pawh population tam zawkna district te nena khaikhin chuan a tlem zawk awm e. Amaherawhchu, sawrkar kut-ke inbun hmasakna hmun a nih angin hmasawnna hrang hrang pawhin min thleng hmasa a; hriatna leh thiamna kawngah pawh rual pâwl tawk tak kan ni a tih theih awm e.

Vawiin ni ropui takah hian kan District chhunga sawrkarin hmasawnna hna hrang hrang a thawhte a tlangpui chauh han tarlang ila: 

1. Sawrkar laipui hmalakna hnuaiah National Highway 54, Kaochao – Tipa inkar kawng pawh 95% thawh zawh tawh a ni a, Laki leh Lope kaltlanga Tipa leh Lopu inkar kawngpui, 70 kms zeta thui pawh thawh mek zel niin, helai kawng hi hmun thum a then niin, hmun khat Lopu khaw bul hnai tih loh chu laih zawh vek tawh a ni. Zyhno leh Chapi inkar kawngpui laih mek leh Kaochao leh Tokalo inkar pawh a tam zawk zawh fel tawh niin, ram lak leh zangnadawmna pek chungchangah chinfel ngai a la awm avanga la zawh theih loh a ni. Zorinpui leh Lomasu inkara kawngpui laih tur pawh ram lak leh zangnadawmna chungchang a fel veleh tan thuai beisei a ni bawk. Tin, Amobyu Vaithie to Siaha kawng laih hna leh Chapi khua atanga Border Pillar inkar kawng laih zawm hna te pawh tan thuai a nih theih nan survey hi February atanga April chhunga neih tum a ni. 

2. Zirna lamah pawh hma kan sawn zel a, tunah hian Tipa leh Chakhei-ah science zir theihna Higher Secondary School hawn tawh a ni a, Zyhno ah Arts zir theihna Higher Secondary School hawn tawh a ni bawk. Hmun kilkhawr zawka naupang ten zirna tha an lo dawn ve theihna turin Tipa ah Netaji Subhash Chandra Bose Avasiya Vidyalaya (Hostel) hawn a ni tawh bawk.  Tin, MADC hmalakna in tunah hian New Delhi ah Mara Tribal Girls Hostel pawh sak mek a ni. Thingtlang lama kan unau dinhmun harsa zawk te tan pawh hmun hla pan ngai lo a kan district ah ngei mai zirna in sang zawk Siaha Government College kan nei te pawh hi malsawmna a ni tih i hre thar leh theuh ang u. 

3. Mipuite hriselna kawnga hma kan lo sawn zel theih nan Health & Family Welfare Department hnuaia thawk doctors leh staff ten April 2024 atanga December 2024 thleng khan Health Camp vawi 42 lo nei tawh in thingtlang lamah pawh Health Mela neih thin a ni a, heng Mela ah te hian damlo 3555 lai an lo en tawh bawk a ni. District Hospital leh PHC ah te pawh damlo 27,168 zet a thlawnin an en a, nu nau pai lai a thlawna checkup leh ultrasound tih sak in, damdawi calcium leh iron te pawh a thlawnin an sem a ni. Tin, nikum April thla atanga tun thleng hian Blood Donation camp vawi 32 neih a ni tawh a, thisen unit 794 pek niin, unit 692 pekchhuah bawk a ni.

4. Siaha district a hmeichhiate dinhmun a lo that zawk theih nan Women & Child Development, Siaha ICDS project hnuaiah hian District Hub for Empowerment of Women (DHEW) chu December, 2022 khan Siaha District ah din tan a ni a, he hub kaltlang hian central sawrkar scheme hrang hrang hmangin hmeichhiate chhawmdawl hna kalpui mek a ni. Tin, Beti Bachao Beti Padhao Scheme hnuaiah pawh Hmeichhe naupang te tan theihtawp chhuaha hmalak mek zel a ni a, hei bakah hian Shakti Sadan leh One Stop Centre pawh din a ni a. Tin, heng hmunah te hian hmeichhe baihvai, nu leh a fate hleihlenna tuarte lo enkawla lo tuamdam a, an mamawhna zawna tanpuina lo pek thin an ni. 

5. PHED Siaha Watsan Division kaltlangin Siaha mipui ten faina kawngah hma kan lo sawn theih nan leh tui lama kan lo hnianghnar zawk theih nan chak takin hmalak reng a ni. No-aotlah - I & II Water Supply Scheme (Solar Pumping) thawh mek a ni a, Vawmtlunglui atanga tui pump tum a ni. Amrut 2.0 hmanga Siaha khawpui tui pump tih changtlun hna ‘Improvement of Siaha Water Supply Scheme’ pawh thawh mek a ni. Tin, Swachh Bharat Mission (Grameen) hnuaiah hian Kum 2024 - 2025 chhung hian Individual Household Latrine (Single Pit), Community Compost Pit, Community Soak Pit khaw 51 tan sak zawh theuh tawh a ni a, Children Sanitation Club khaw 51 ah din vek tawh a ni bawk. 

6. Siaha District mipuite ei leh bara kan lo intodelh zawk theih nan leh kan buh leh thlai thar te a lo pun zual zel theih nan Agriculture leh Horticulture Department lam pawhin nasa takin hma an la zel a, huan leh lo neitute hnenah thlai leh thei chi te a thlawn leh man man zawkin an sem bakah scheme hrang hrang hmangin tanpuina sum faite pawh pek an ni. Dt. 31.10.2024 khan Zyhno ah Buhseng Kutpui chu hlawhtling takin Agriculture Department hmalakna hnuaiah neih a ni a, buhseng hnem pathumte hnenah lawmman (award) sem a ni. African swine Fever avanga vawk thi chhawmdawlna pawh chhungkaw 106 te hnenah Veterinary Department lamin 50% compensation an pe chhuak tawh a, Vety Hospital kal thei lo te tan Mobile Veterinary Unit (MVU) kalpui mek a ni bawk. Fisheries Department lam te pawhin sangha chi 3,50,000 zet chu sangha khawitu te hnenah 75% a tlawmin a pe chhuak. DCSO lam pawhin ration buhfai leh chini te pawh tha takin a sem zel a, tun kum fur chhunga hmun kilkhawr zawka awm ten buhfai an nghei loh na tur pawhin chak taka hma la in buhfai te pawh an lo in stock tam tawh a ni. Tunah hian Godown hmun thum- Siaha, Chapi leh Siata ah te sak mek a ni. District Sericulture Office hmalakna in tunah hian hian No-aotla leh Lobo khuaah te pangang khawi kalpui mek a ni a, a hlawhtlin thuai beisei a ni. 

7. District Social Welfare and Tribal Affairs lam pawhin keini tribalte tana hamthatna hrang hrang kan hmuh theih nan leh kan dinhmun te a lo san zawk theih nan Central scheme hrang hrang hmangin kum upa lam tan old age pension leh hmeithai tan widow pension te siam sak an ni a, rualbanlo te tan pawh Disability Pension Scheme leh Handicapped Students Stipend hmangin tanpuina sum pek thin an ni. No-aotlah ah Eklavya Model Residential School (EMRS) chu 15th November 2024 khan P.M in a lo hawng tawh bawk. 

8. Tunah hian, District Employment Exchange kaltlangin thalai hna zawng mek mi 866 register niin, ITI Siaha ah pawh discipline hrang hrangah zirlai 39 an awm mek. MADC hnuaia Sports & Youth Services Department pawhin thalai hna nei lo te tan lungrem, puan thui leh IELTS training te a lo buatsaih sak tawh bawk a, Meisatla ah hian Multi-Disciplinary Centre sak mek a ni. District Industries Centre, Siaha hmalakna in Micro Small & Medium Enterprises (MSME) Udyam hnuaiah sumdawng mi 88 inziaklut tawh in, PM Vishwakarma scheme hnuaiah mi 111 thlan chhuah tawh an ni a, an eizawnna kawng an zauh theih nana tanpuina dawng thei turin training an la hmabak a ni. 

9. Legal Metrology hmalakna in Petrol leh Diesel phurtu tankers te leh eirawngbawlna gas phur truck te endik thin a ni a, Petrol trip 171 leh  Diesel trips 295 leh LPG trip 263 te endik niin,  Tipa leh Siaha ah gas bur rit tawk lo 50 man a ni. Sumdawng 4 hnen atangin Foreign Cigarette box 2712 man a ni a, sumdawng leh dawrkai ten bukna dik an hmang ngei em tih enfiah a ni a, tui meter 423 enfiah a ni bawk. 

10. Taxation Department, Siaha chuan kum 2024-2025 chhungin GST & VAT atangin December 2024 thleng khan cheng 79,98,555 an hmu tawh a; GST registration mi 174 in an ti tawh bawk.  DI&PRO lam pawhin an hna tha taka thawkin sawrkar ni pawimawh te a hun taka cover in an tihtur an tlin hle a ni. 

11. Siaha District Police te thawhrimna leh inpekna zarah kum 2024 chhungin Siaha District-ah thubuai 110 ziah luh a ni a, heng zing atang hian case 89-ah charge sheet thehluh niin chhui lai mek (pending investigation) case 12 awmin charge sheet submit tlak loh (Final Report Case) case 9 a awm bawk a ni. Charge Sheet tawh case 89 atang hian Court in a chungchang a relfel tawh (judgment Order issued) case 37 an awm a ni. Court in a rel tawh case 37 atang hian case 36 ah thil tisualtu thiamloh chantir (convicted) an ni a, nikum conviction rate hi sang hle in, 97.29 % a ni. Tin, nikum chhung khan Drugs case ND&PS Act hnuaiah case 9 ziah luh ani a, heng drugs case a inhnamhnawih zawng zawng mi 10 te chu thubuai siamsak niin district jail a dah luh vek anni bawk.

A tawp berah chuan vawiina helaia lo kalkhawmte hnena thuchah leh ngenna ka siam duh chu, ram leh hnam tan kan theihna leh thiamna te hlan zelin, kan theihtawp chhuah zel ila, midangte tan malsawmna nih theuh I tum ang u. Kum 2025 ah hian department kaltlanga sawrkar hmalakna te lo hlawhtling zel se la Siaha District tan hmasawnna kum lo ni mawlh rawh se. 

India khua leh tui tha tak ni chhunzawm zelin, Jai Hind. Ka lawm e.