No.2668/2021-2022
Aizawl, the 21st October 2021 : 7th Economic Census buaipui tura Chief Secretary kaihhruaina hnuaia din State Level Co-ordination Committee (SLCC) chu vawiin khan Chief Secretary Pu Lalnunmawia Chuaungo hovin CS Conference Room ah an thukhawm a, provisional results ah data thenkhat diklo nia ngaih theih leh data inmil lo chungchang an sawiho a ni.

Meeting ah hian Common Service Centre te kaltlanga data lakkhawm atanga Ministry of Statistics & Programme Implementation in Provisional Results an chhawpchhuah leh District thenkhata data inmil lo nia ngaih theih te chu Economics & Statistics Department hotute chuan an tarlang a. Heng data inmil lo siamtha tur hian Survey tih that leh nise tih meeting-ah hian rawt a ni a. Data lakhawmtu atana CSC ten mi an rawih lehchhawn te chuan duh angin inhrilhriatna tha an pek tawk loh avang te, internet connectivity a that tawk loh avang tein data inmil lo hi a awm nia an ngaih thu an tarlang a ni.

Chief Secretary Pu Lalnunmawia Chuaungo chuan Economic Census hi sumdawnna leh a kaihhnawih atanga sum dehchhuah tarlanna bu pawimawh tak a nih avangin data dik neih a pawimawhzia sawiin data inmil lo te chu ennawn tura hma lak vat ni se, a ti. Planning & Programme Implementation Secretary Pu Lalmalsawma Pachuau chuan 7th Economic Census chu Common Service Centre te kaltlanga a vawikhatna atan digital mode a kalpui a nih avangin data inmil leh diklo nia ngaih theih te chu Provisional Results ah a rawn lang niin a sawi a ni.

6th Economic Census thleng kha chuan Economic & Statistics Department in engkim an buaipui thin a, 7th Economic Census ah erawh chuan Sawrkar Laipuiin tih dan rawn thlakin data lakkhawm leh upload chu CSC te kutah dah a ni a, digital mode in an kalpui ta a. Hei hian connectivity that lohna hmunah te chuan harsatna a siam a ni.