No.2667/2021-2022
Aizawl the 21st October, 2021: Vawiin khan District Rural Development Agency Office Building, Saitual District Lungphum phumna hun chu Govt. Saitual College Auditorium-ah Rural Development Minister Pu Lalruatkima'n a nei.

Khuallian Pu Lalruatkima chuan DRDA Office Building sakna Saitual-ah lungphum phumna hun tha tak buatsaih a nih chu lawmawm a ti a. Bul tan nana hma latu leh DRDA a than zel nana tha leh hun tam tak sengtu khawtlang hruaitute bakah DC, Saitual District hmalaknaah leh tawiawmnaah lawmthu a sawi bawk a. Rural Development hi Mizoram sorkar department neih pawimawh ber te zing a mi a ni a, thingtlang hmasawnna turin theihtawp chhuahin ke a pen zel a; hmalakna chi hrang hrang MzSRLM hnuaiah SHG, VO te kaltlangin eibar kawngah leh mahni ke a ding thei turin group member te tan hma tam tak lak mek a ni a. Eizawnna mumal neilo ten eibar an neih theih nan ni 100 inhlawhna pawh hlawhtling takin Mizoram ah kalpui mek a ni a, nikum Covid-19 hripui leng karah pawh hlawhtling taka lo kalpui tawh a ni, a ti a. Ni 100 inhlawhna hi hripui leng karah Aizawl khawpui urban slum ten inhlawhna an neihloh laiin thingtlang hnathawk tuten inhlawhna tha an nei thei chu a lawmpui thu a sawi a. Department a thawktu lam te pawhin thahnem ngai takin internet connection neih that loh karah pawh geo-tagging leh record mumal taka an kalpui zel thei hi lawmawm a ti bawk a ni. Minister chuan sik leh sa inthlak danglam zelah tui hna humhalh nan RD Department chuan hma a la mek a, a bik takin Siaha District ah tui hna humhalh kawngah hmasawnna nasa tak kan hmu a ni tiin a sawi a. MGREGA kaltlangin zoram hmun hrang hrangah farm ponds te enkawl puiin hlawhtlinnna tamtak kut hnathawktuten an hmu tiin a sawi bawk.

Minister chuan Covid-19 hripui dona kawnga tha leh hun tamtak sengtu Taskforce te, NGOs bakah Kohhran hrang hrang member te chungah lawmthu a sawi a. Heng hun harsa kan tawh laia zonun ze mawi lo lang thin chu kan hnam rohlu a ni a ti a. Covid-19 hrileng karah insawisel mai lo a thurawn pe zel turin leh tawngtaipui zel turin Kohhran te a sawm a ni.

DRDA Office Building thar hi KVI Complex hmunhma a sak tur a ni a. Feet 45, feet 30 a zau tur a ni. April 2022 a sak zawh hman beisei a ni a. Tun dinhmunah hian Project Director bakah thawktu 8 an awm mek a. Saitual District chhungah khua 44 an awm a, heng khua te hi Phullen RD Block ah khua 12, Ngopa RD Block ah 13 leh Saitual Zone ah khua 19 an awm a ni. DRDA Office hi March ni 18, 2021 ah hawn a ni a, April ni 1, 2021 khan mipuite dawr theihin office function a ni.

He hun hi RD Director Pu R. Lalthazuala'n kaihruai a, Deputy Commissioner Pu VL Hruaizela Khiangte pawhin thu tawi sawina hun a nei a; Project Director Pi Margaret Lalrinawmi Fanai chuan report pe in, Joint Secretary Pi Irene Zohlimpuii Chongthu chuan lawmthu sawiin he hun hi a khar a ni.

Hemi hnuah hian Minister Pu Lalruatkima chuan Thingsultliah BDO Complex-a hnathawh kallai mek a hmunah enfiahna hun a nei nghal a ni.