Vawiin chawhma ah khan Seventh Legislative Assembly of Mizoram a session vawi 8-na chu tan ni a. Session tan ni ah hian  House ah Mizoram Governor Lt Gen. Nirbhay Sharma (Retd.) chuan thu sawi in sawkar kum liamta chhunga Mizoram in hmasawnna a neih te leh hmalakna kal mek te a tarlang.

Legislative Assembly of Mizoram ah a vawikhatna atana  thusawitu, Mizoram Governor Lt Gen. Nirbhay Sharma (Retd.)  chuan Speaker leh Legislative Assembly of Mizoram a member te chu Mizoram tana hruaitu rintlak leh mipui te innghahna an nih thu a hrilh a. Mizo mipui ten an hruaitu atana an thlan tlin te thawhrimna zarah Mizoram chu India ram a state ralmuang ber pawl ni chhunzawm zel thei se a duhthu a sawi a. Governor chuan Mizoram chu kawng tinreng a state intodelh ber pawl a lo nih thuai theihna tura theihtawp chhuah zel tur leh  thahnem ngai  turin Legislative Assembly of Mizoram a member te chu a ngen a ni

State chhunga hmasawnna tam tak zingah Bye-Election to 12-Aizawl North – III(ST) A/C leh Aizawl Municipal Corporation inthlan hlawhtlinna chu a langsar bik a ni a ti. Inthlanna felfai leh sawisel tur awm lova  nei zawh tak te chu State dangte pawh in an ngaihven, Mizoram tana hlawhtlinna langsar a nih thu a tarlang a. Khawtlang mipuite leh tlawmngai pawl ten sawrkar an thlawp tlat vangin he hlawhtlinna hi a lo awm a ni a ti. “Thawhrimna leh inpekna avanga YMA in India President hnen atanga Voter te hnena zirtirna pe tha ber lawmman an dawng  kha ka chhuang tak zet a,  an phu bawk a, anni leh an thawhpui ten sawrkar an thlawp tlat vangin inthlanna kha a felfai a ni”, a ti.

State Flagship Programme, NLUP hnuaia Trade hrang hrang ah te hlawhtlinna duhawm tak tak kum 2010 a NLUP tan a nih atangin a awm thu a tarlang a. NLUP kalpui hma aiin kalpui a nih hnuah buhhmun 39.04 % lai in a zau zawk tawh a ni tiin Mizoram chhunga buh tharchhuah pawh 22.21% a pung a ti a.  Kum 2010 a Tlangram buhhmun atan a ram mamawh  28,562 Hectares lai a zau chu nikum ah khan 8497.195 hectares ah a tlahniam tawh a ni a ti. Agriculture leh thildanga hmasawnna neih a tul rual in thangthar te tana chenna tlak ram tha siam sak a pawimawh a. Chu chu state flagship programme pawh in a tum a ni tiin ramngaw leh nungcha humhalh thleng in NLUP in a huam tel thu a tarlang.

Mizoram Economy sector hrang hranga hmalakna leh hlawhtlinna pawimawh tak tak te kimchang taka a tarlan hnu ah Governor Lt Gen. Nirbhay Sharma (Retd.) chuan sawrkar kum liamta chhunga Mizoram sawrkar in sum leh pai a lakluh te tarlang in chhiah tling khawm leh thil dang atanga sawrkar zem a sum rawn tling khawm chu kum hmasa lam aiin a tam chho telh telh a ni a ti in Mizoram economy hmalam hun a en thu a sawi.

Governor in House ah  a tarlan dan chuan sawrkar kum kal mek 2015-16 January 2016 thlenga Taxation Department in chhiah a lakkhawm chu Rs.218.73 crore niin January 31, 2016 thlenga Excise & Narcotics Department in excise duty atanga sum a lakkhawm tawh zat chu Rs.47.75 crore a ni thung. December 2015 thlenga  Transport Department in chhiah/lei man a lakluh tawh zat chu Rs.16.88 crore ni in Institutional Finance & State Lottery Department pawh in January 2016 thleng khan  thumvawrna atangin Rs.9.12 crore a  lakluh tawh bakah small saving schemes atangin Rs.4.89 crore a la lut tawh a. December 2015 thleng khan Land Revenue & Settlement Department chuan Tax revenue Rs.4.02 crore lalut tawh in stamp duty, registration fee leh thildang atang in Rs.2.31 crore a lalut tawh bawk a ni.  PHE Department pawh in December 2015 thleng khan Rs.24.06 crore  a thawk chhuak tawh a. Hetih lai hian  Geology & Mineral Resources Department chuan December 2015 thleng khan Rs.3.95 crore chhiah atangin a lalut tawh bawk a ni.  The Mizoram Minor Mineral Concession Rules 2000 hman mek chu ennawn a nih hnuah phei chuan Geology & Mineral Resources Department a chhiah lut tur zat hi 20-30% lai in a pung chho tura chhut a ni.  Kum 2011 – 2012 a bungraw man sum a chantir zat behchhan a  Economics & Statistics Department in Mizoram State Gross Domestic Product  a chhutchhuah chu Rs.6887.95 Crores niin Mizoram a cheng  mi pakhat theuh in kum khat chhung in Rs.52,624/- a thawk chhuak a ni.