Vawiin khan DAO Conference Hall, Kolasib ah Lo leh Huan a tui lakna, tui kawng siam leh a pekna tur ruahmanna thar Sawrkar Laipuiin tunhnaia a duan 'Pradhan Mantri Krishi Sichayee Yojana' (PMKSY) chungchangah Kolasib District a loneitu leh thurawn tura ruat Farmers' Friend ten an hmelhriat theihna atan Agricultural Technology Management Agency (ATMA) chuan hemi chungchangah Farmer Scientist Interaction programme an buatsaih.
Programme hi Kolasib DAO Pu R. Lalnunzira chuan kaihruaiin hun hmanpuitu Dr. H. Saithantluanga, Director, Mizoram Agricultural Management Extension and Training Institute (MAMETI) chuan India hmun dang ngaihtuahin kan huan leh loah te tui pekna kan nei tha tawk lova, chuvangin he ruahmanna thar hian nasa takin loneitu leh huan neitu a puih theih ngei a rinawm a; lo leh huan a tui pek dan chu he scheme thar hian a thlung zawm dawn a, Agriculture Department, Horticulture Department leh Minor Irrigation Department leh DRDA te kan thawhho a ngai dawn a ni, a ti. PMKSY tum leh a kalpui dan tur tlangpui a tarlang bawk.
He hunah hian huan leh loah tui pekna kalpuitu Line Department dang pahnih - Minor Irrigation atangin Pi Jacinta Laltanpuii, SDO in Accelerated Irrigation Benefits Programme (AIBP) leh Horticulture Department Pu H. Lalthlamuana, Divisional Horticulture Officer in On Farm Water Management (OFWM) chungchang an sawi a. ATMA in loneitu a puih dan kawng hrang hrang chu Pu Rambuatsaiha, Deputy Proejct Director, ATMA in a sawi a. PMKSY chungchanga thil pawimawh hrang hrang chu Dr. V. Zodinsanga, Deputy Project Director, ATMA in a tarlang bawk a ni.
Kolasib District chhungah hian AIBP kaltlang hian project 3 thehluh mek a ni a. PMKSY hnuaia hian State Irrigation Plan leh District Irrigation Plan te siam a ngai dawn a, chumi behchhan chuan ruahmanna te siam tur a ni.
PMKSY hian tunah kalpui mek AIBP, huan leh lo tin tui pek Har Khet Ko Pani, far tinah tharchhuah tam Per Drop More Crop leh Watershed Development te a khaikhawm anga, hengte atang hian irrigation scheme changtlung tak siam a beisei a ni. Thingtlanga lehkha thiam ten loneih leh huan enkawlna lamah thiamna bik an neihna atan tun hnai khan Sawrkar Laipui chuan Skilled Development for Rural Youth chu state 10 ah bultanna nei turin thu a ti tlu a. Chung state-ah chuan Mizoram pawh telin District pali - Aizawl, Kolasib, Mamit leh Lawngtlai a thalai te tan kumin chhung hian training buatsaih a tum a ni.
