3343/2023-2024

Dated the 15th January, 2024: Vawiin khan AR Ground ah 8th Armed Forces Veteran Day lawmna leh Mizoram Ex-Servicemen Re-union programme Sainik Welfare & Resettlement, Mizoram bultuma buatsaih a ni a. Chief Minister Pu Lalduhoma chuan khuallian niin a hmanpui.

Thu sawiin Chief Minister chuan, Khawi ram mai pawh hi an history han en ila, ram emaw hnam anga an lo dinchhuahna bulah hian indona hian hmun pawimawh a lo khuar deuh zel a. Chutiang indona a lo awm apianga eng ram pawhin kan hmachhuan leh kan hmanraw neih hlu ber chu sipaite an ni. Sipaiten ram leh hnam chhan turin, an nunna pawh chan dawn se pawi ti phal lovin an bei a, hnehtu an nih chuan mipuiten 'ram' kan lo nei ta thin a ni. India ramin kum 77 chhunga khawvela ram ropui ber te zinga mi ni theia a inhlankaina kawngah sipaite hian in thawh nasa em em bawk tiin sipaite pawimawhna a tarlang a. In phu ang ngeiin Central sawrkar pawhin a ngaihsak che u a, Pension a hun takah in la a, free medical treatment in dawng thei a, ECHS (Ex-servicemen Contributory Health Scheme) huang chhungah ZMC (Zoram Medical College) hman theih a lo ni ta bawk a. Vawiin hian Mizoram State Cancer Institute nen inremna thuthlung pawh intan ziah a ni dawn niin ka lo hre leh zel a, a lawmawm hle. Mizoram sawrkara hna hauhsak bik (job reservation) in neih te chu in chanpual ah lo dah ula, harsatna in neih chuan ka hnenah in rawn thlen dawn nia, a ti a ni. Mizo thalai tam zawk sipaiah lut thei se a duh thu pawh a tarlang a ni. Chief Minister hian lawmman dawngtu mi 9 te hnenah lawmman a hlan bawk.

Kal khawmte lawmna Surg Lt Cdr Lalnuntluanga (Retd), Director, SW&R chuan a sawi a. Chief Minister-in an day a hmanpui avangin lawmthu a sawi a. Veteran Day ni tak hi nimin kha a ni a, mahse kan Chief Patron, kan Governor ni bawkin vawiina lawmna neih min remtihsak avangin kan lawm hle a ni, a ti. Veteran Day hlim taka hmang turin duhsakna a hlan a ni.

Lt Col ZS Zuala (Retd), Sr. Vice President, Mizoram Ex-Service Leaque pawhin thusawiin, tun sawrkar tharah an member pahnih Lt Col Clement Lalhmingthanga (Retd) leh Pu TBC Lalvenchhunga, Petty Officer (EM), te an tel mek a, sipai bang, MLA a tling hi Mizoramin kan nei nual tawh a, kan chhuang thin hle a ni, a ti. Sainik Welfare & Resettlement in an enkawlna tha a tih thu leh an lawm thu a sawi bawk.

Arm Forces Veteran Day hi kum 1947 chhova India independent hlim chhawn indo laia Field Marshall KM Cariappa, OBE, India mi dik tak (native Indian) Commander-in - Chief of Indian Army ni thei hmasa ber, chumi pension ni champhaah hman a ni a, a ni tak chu nimin ni 14 zawk kha a ni.

Maj Rebecca L. Chhakchhuak (Retd), DSW & RO, Aizawl district chuan lawmthu sawiin a lawmna inkhawm hi a khar a ni.