8th Batch of Reang (Bru) Repatriation 1st November, 2016 a neih tan tur a hmalakna sawihovin vawiin khan District Level Core Committee chu an chairman Pu H.Lalengmawia, Deputy Commissioner hovin an thukhawm.

State Level Core Committee in ruahmanna a siam ang chuan Mizoram mi Reang (Bru) tuna Tripura Transit Camp-a awm mek te hruaikir hna thawh riatna (8th Batch) hi November 1, 2016 atang tan tur a ni a, Mizoram mi ngei an ni em tih endik hna Identification Team ten November 1, 2016 atanga tanin, endik te hruaikir hna 30th November, 2016 atang thawh tan a ni ang.

Kolasib District a Reang (Bru) let tur beisei zat hi chhungkaw 628 niin, khaw pariat ; Bairabi, N.Thinglian, Dilzau, Zodin (Rastali), Meidum, Pangbalkawn, Bukvannei leh S.Chhimluangah chentir an ni ang a. Saikhawthlir leh Rengtekawn-ah zinkawng a an chawlhlailawkna siam tura ruahman a ni a, anmahni chenna tur in an buatsaih theih hmaa an chenna tur Temporary shelter siam man tur te, community kitchen leh lirthei chuan man te chu Sorkar laipuia Ministry of Home Affairs-in Mizoram sorkar rawtna a pawm hnuah kimchang zawka ruahmanna siam thar a nih leh tur thu meeting-ah hian sawiho a ni.

Vawiin meeting-ah hian Reang (Bru) hruaikir hna hlawhtling taka neih a nih theih nana tih tur tul ang ang te hun tiam ral hmaa ti hman ngei turin a mawhphurtute inhrilhhriat a ni a. Meeting-ah hian committee member te bakah Pu David H. Thangliana, OSD Home telin, hmalakna hrang hrang te a tarlang a ni.