Chief Minister Pu Lal Thanhawla’n vawiin khan Chanmari YMA Hall-ah ruihlo ngaite enkawlna atana pawl intelkhawmna Federation of Indian NGOs for Drug Abuse Federation (FINGODAP) Mizoram Chapter in ruihhlo laka thalaite leh zirlai te an fihlima hemi kawnga zirtirna leh inhrilhhriatna atan Drug Abuse Prevention Awareness Programme an buatsaih chu a hmanpui a. He programme hi Social Welfare Department enkawltu Minister Pu PC. Lalthanliana pawhin a hmanpui a ni.

Chief Minister Pu Lal Thanhawla chuan Sawrkar leh tlawmngai pawlten eng ang pawhin ruih hlo hi do mahse thalai ten a dona leh a tin sanna rilru an neih loh chuan ruihhlo chu a rem lovang tih a hlauhthawn thu a sawi a. Sawrkar, tlawmngai pawlte leh Kohhranin theihtawp chhuahin thawk hovin ruihhlo dona kawnga hma an la mek lai hian thalai leh zirlai ten ngaihtuahna fing leh fim hmanga an pawn lam leh chhung lam nun an fimkhurpui hle a ngai a ni, a ti a. Ruihhlo laka fihlimna tha ber leh tlo ber chu inhnamhnawih loh hi a ni mai a tiin ruihlo chin hi thil hote nia lang, zuk leh hmuam leh vaihlo atang tein a in tan a, heng lakah pawh kan fihlim a pawimawh takzet ni, a ti bawk.

Pu Lal Thanhawla chuan thalai ten ruihhlo an ngaihtuah loh nan leh kawng diklo an zawh loh nan sawrkarin theihtawp chhuahin kawng hrang hrang abik takin infiamna, zirna leh skill development lamah thalai te tan khawvel thar buatsaihin hma a lak mek thu sawiin heng thil te hi chhawr thei tura in awm a pawimawh a, chumi atan chuan ruihhlo leh thil thalo tinreng hi in hawisan leh in tih loh a pawimawh ber a ni tiin he huna naupang kalkhawmte chu a fuih a. Thalai te chu naktuk naktipa ram nghahfak leh ram khai dingtu te an nih thu sawiin ram ropuina atan thalai te koa mawhphurna a innghat a mahse ruihlo laka infihlim loh chuan Mizoram hi ram ropui kan siam lovang tih a hlauhthawnawm a chuvangin hei hi hriaa in rilru leh ngaihtuahna insiam thar a pawimawh a ni a ti bawk. Pathian thuin nu leh pate thuawih chu mihring nunna atan thil tha ber anih thu leh chu chu damreina anih thu a zirtir tih sawichhawngin Chief Minister chuan mi hlawhtling leh chhungkaw hlim te hi mi dang laka mi ropui nilo mahse an hlawhtlinna leh an hlimna chhan chu nu leh pate thu awiha an awm vangte, an inngaihtlawm avangte leh Pathian tihna tela dikna leh takna nen an nun vangte a ni, a ti a. Kan nih loh pui nih tumna hian nunah beidawnna depression a thlen theih thu sawiin ruihhlo that loh zia leh nun a nghawng dan te hi thalai ten an thiante zinga an sawi tam leh an sawi uar a pawimawh thu a sawi bawk.

Social Welfare Minister Pu PC. Lalthanliana pawhin thu sawiin ruihhlo hi sawrkar angin emaw, pawl angin emaw do hneh mai chi a ni lova, mimal tin hi ruihhlo dona a kan tan tlan hi a pawimawh hle a ni, a ti a. Ruihhlo lakah vawiin hian kan fihlim a ni thei a, amaherawh chu kan kawngka bulah a awm reng a ni tih hi i theihnghilh lovang u tiin zirlai naupang te chu tihchhin chakna rilru nei lo turin leh an nunah ruihhlo leh thil tha lo reng reng senglut lo turin a fuih a. Ruihhlo dona kawnga dan thar “Mizoram Drug Demand Policy 2016” leh “Mizoram Drug (Controlled Substance) Bill 2016” te chu Cabinet in a pawmpui thu te sawiin heng dan te hi Assembly thutkhawmna hmasa berah putluh anih tur thu a sawi.

Vawiin programme hi FINGODAP Mizoram Chapter President Pu N. Samuela’n kaihruaiin rilru lam doctor Dr. Lalhrekima’n ngaihnawm takin ruihhlo that loh zia leh a laka inven dan kawng tha tak te sawiin hun a hmang a ni. Hetiang programme hi Mizoram hmun hrang hranga FINGODAP hruaitu ten buatsaih an tum thu an sawi bawk a ni.