Vawiin khan Environment, Forests & Climate Change (EF&CC) Department chuan an Minister Pu Lalrinmawia Ralte hovin PCCF Conference Hall, Tuikhuahtlang-ah Quarterly Review meeting an nei.

Meeting hawnna inkhawm tawi buatsaihah Minister chuan Divisional Forest Officer kalkhawmte chu an hnaah thahnemngai taka thawk a, Department din chhan leh a thil tumah chianga, tha thlah lova thawkho zel tura a duh thu a sawi a. Dampa Tiger Reserve tihzauh nan a Serhmun khua sawn chhuah tum na chung changah uluk taka hma lak mek a nih thu tarlangin, Kawrthah Division area huam chhung a KTZKT road, ABCI in a laih mek chu, danin a phut ang a Forest Clearance lak hmasak a nih loh avangin Forest Department-in stay order a pek thu tarlangin, he kawng laih zawm leh thuai a nih theih nan Sorkar department-te leh user agency-te chu tan la tura a duh thu a sawi bawk. Forest Minister hian a tlangpuiin nungcha humhalh kawngah mipuite kan thangharhin kan rilru puthmang pawh a changkan viau tawh rualin, Sorkar dan zawm lova ramngaw tichereu leh ramsa tihlum an la awm zel chu thil pawi tak anih thu a sawi a; heng mite hi dan ang taka hrem tur an ni tiin, dan lekkawh chung changah department officer leh staff te tan la leh zual turin a fuih bawk.

Hun kaihruaitu Pu LR Thanga, PCCF & Principal Secretary chuan Department in kawng tam taka hmalakna a neih rualin thawh belh tur erawh a tam hle thu a sawi a. EF&CC Department a thawkten mawhphurhna zau tak an neih thu sawiin, officer leh staff te chu an hnathawh ah fimkhur takin, Conduct Rules in a phuar ani tih hre chungin thahnemngai taka thawk turin a duh thu a sawi bawk.

Vawiin Quarterly Review Meeting-ah hian EF&CC Department hnuaia scheme hrang hrang CAMPA, Project Tiger, Integrated Development of Wildlife Habitat, National Agro Forestry and Bamboo Mission, National Afforestation Programme, Intensification of Forest Management Scheme, JICA project, Green India Mission, Climate Change leh Court Case chung changah te report pek a ni a. Heng report te hi uluk taka thlir ho niin, Mizoram a Saw Mill Regulation chung chang bakah, mimal leh Sorkar ram a ramhmul damdawi (medicinal plants), heng anchiri leh hmunphiah te hi awmze nei taka chhinchhiah a tul thu tarlan a ni a. Private tree plantation zawng zawng pawh bialtu DFO hnenah register vek a nih tur thu tarlan a ni bawk. DFO kalkhawm zawng zawngte atang hian an bial chhunga kangmei chhuah dan te, Green Mizoram Day hman dan leh Wildlife Offence chungchangah vawiin hian report ngaihthlak a ni bawk.