Vawiin khan DC Conference Hall, Mamit-ah Dr Lalrozama, IAS District Bawrhsap kaihruaina-in Tripura Transit Camp paruka Reang(Bru) awmte a thawhriatna atana leklet hna kalpuina tura tul hrang hrang leh inbuatsaihna te thlirhoin District Level Core Committee on Reang(Bru) Repatriation thutkhawm a ni a. Home Department lam atangin Pi Lalbiaksangi, Addl. Secretary leh Pu David H. Lalthangliana, OSD Home Department-te chuan an telpui bawk.

Meeting kaihruaitu Dr Lalrozama chuan Mizoram Sawrkar issue lian tak anih angin Reang (Bru) laklet hna kalpui leh tura ruahmanna siam a ni a. Mamit District chu laklet tur chhungkaw ngah ber kan nih avangin a bupui ber kan ni dawn a. Sawrkar Officials hrang hrangte pawhin kan mawhphurhna theuhte pawh uluk leh thahnem ngai taka kan hlenchhuah a tul dawn a,  Mamit District chhunga Village council hrang hrangte leh tlawmngai pawlte hemi atana thawhpuiah a sawm a ni.

Pi Lalbiaksangi, Addl. Secretary chuan nikum lama Sawrkar leh All NGO te'n inremna thu an lo neih tawh angin Tripura Transit Camp-a Reang (Bru) awmte chu kumin Oct thla atang hian laklet hna thawh tum a nih thu a sawi a. Boruak muanawm, a let tur dik takte laklet an nih theih nana tihtur tul hrang hrangte leh Department hrang hrang te'n a kan mawhphurhna leh senso ngai tur zatte sawikhawma ruahmanna siam chu an inkohkhawm chhan a nih thu a sawi bawk.

Meeting-ah hian laklet hnathawhna tura Identification kalpui tawh atangin ruahmanna hrang hrangte thlirho a ni a,  Mizoram Sawrkarin Reang (Bru) laklet hna a thawh tantirh atanga Mizoram khua leh tui dik tak rawn lette hnenah Central Sawrkarin a tanpuina Financial Assistance, (Chhungkaw pakhat in sa lo tih loh) pek kim vek an nih tawh thu tarlan a ni a, lakletna hna kalpui lehna turah hian Mamit District chhunga rawn let tur hi chhungkaw 4185 an awm mek a ni.

Vawiin Meeting-ah hian 8th Batch Repatriation kalpui lehna tura senso ngai zat, leklet hna kalpui tura mihring mamawh zat leh tul hrang hrang chhawpchhuah niin thlirho zui a ni a. Mizoram khua leh tui dik tak rawn let turte awmna tur atana ruahman Mamit District chhung khaw 40-a khawtlang hruaitute nen June thla chhung ngei hian an hmunhma chungchang sawiin DC hova meeting neih nise tih a ni a. Heng hmunhmate hi anmahni bialtu theuh AO, Forest, Revenue, NGO-te nen a hmunah enfiah nise tih a ni bawk.

Laklet hna kalpuina tur atan hian venhimna lam chungchang sawiho niin SP, Mamit leh 4th IR-te chu mawhphurhna pek an ni a. An hriselna endikna kawnga hmala turin District Medical Superintendent (DMS) chu ruahmanna felfai tak lo siam tura tih a ni bawk.

Meeting-ah hian District Level Core Committee on Reang (Bru) Repatriation-te bakah sawmbikte an tel a ni.