Ni 7th September, 2009-a tan tak 8th Mizoram University Sports Meet 2009 chu vawiin khan AR Ground-ah Mizoram Larsap leh University Rector ni bawk Lt. Gen. M M Lakhera, PVSM, AVSM, VSM-in a khar a. He hun hi Mizoram University Vice-Chacellor Prof. A.N.Rai-in a hmanpui bawk a ni.

 

 

 

Khuallian Larsap chuan thusawiin University hotute leh zirlaiten Sports Meet hlimawm tak, boruak muanawm tak karah an buatsaih thei chu a lawmawm a ti a. Rampumah Mizoram University chu zirna leh zirlaite inkaihhruai danah  mite ngaihven leh hriat a hlawh tan hle a, hei hi Mizoram leh Mizote tan inchhuanna tlak a ni, a ti. He University hnuaia thawk leh zirte chu Mizoram aiawha palaite an ni tih hre reng tura chahin Larsap chuan Mizoram chu state muanawm berte zing ami, remna thuthlung (peace accord) hlawhtling tak nei a nih avangin kan thu sawi leh kan thil tih ah te fimkhur ila, Mizoram hmingthatna hi chawisangin chhawmnun zel a pawimawh a ni, a ti. Kuminah Mizoram University chuan Vice-Chancellors’ meeting pawimawh tak a thlen tur thu tarlangin Larsap chuan India rama University lar tak tak Vice-Chancellor 14 laite chu Mizoram-ah an rawn zin thuai dawn a, anni hmuhah pawh Mizoram chu state muanawm tak, hnam chitin reng inunauna tha tak nei leh zirna atan pawha hmun duhthusam a nihzia i pholang vek ang u tiin vawiina Sports Meet-a kal University hotute, zirtirtute leh zirlaite chu a chah a ni.

MZU Vice-Chancellor Prof A.N.Rai pawhin thu sawiin Sports Meet chhungin zirlaite inkarah boruak tha tak, inpawh tak leh hlim taka sport discipline hrang hrangah an inel thei avangin lawmthu a hrilh a. College Principal leh zirtirtute thawhrimna a fak bawk a ni. He Sports Meet-a ti tha mimal leh team te chu tun atanga reilotea East Zone Varsity Sports Meet awm turah Mizoram aiawhin an chhuah tur thu tarlangin Vice-Chancellor chuan kum dang ang bawka Mizoram tan theihtawp an chhuah leh ngei turin a fuih a ni.

8th MZU Sports Meet-ah hian Mizoram chhunga College 18 atangin infiammi 1000 chuang an tel a, Sports discipline 7 - football, hockey, badminton, volleyball, basketball, table tennis leh chess - ah te an inel a ni.  Govt. Hrangbana College, Aizawl chuan Gold 3, Silver 4 leh Bronze 2 laiin Over-all Champion an ni a, 2-na Pachhunga University College chuan Gold 2, Silver 1 leh Bronze 1 leh 3-na Govt. Saiha College chuan Gold 2 an la bawk a ni. Sports Meet-a lawmman te chu Khuallian Larsap leh Vice-Chancellor Prof. Rai thiannu ten an sem a ni.