India ram pum huapa lemziak leh Art chi hrang hranga tuimi te fuankhawmna hun, National Art Festival vawi 8-na chu vawiin atangin Aizawl-ah neih tan a ni a. He Festival hi Lalit  Kala Akademi, New Delhi leh Mizoram Art & Culture department ten an buatsaih niin vawiina a hawnna inkhawm, Chaltlang Tourist Lodge-a neihah His Excellency Governor, Lt.Gen(Rtd) M.M.Lakhera PVSM,AVSM,VSM chu Khuallian a ni a. Art & Culture Minister Pu P.C.Zoram Sangliana chu Khualzahawm a ni bawk.

Hawnna thuchah sawiin Governor chuan ram khat mi ni si, India ram hmun zau zawka chengte leh hmarchhak mite kan inhre pawh tawn lo chu a vei thu a tarlang a. Inpumkhatna tha zawk nei turin inhmuh tam leh thil tihho uar a pawimawh a ni, a ti. Hnam ziarang inhriat sak tawnna atan Art chu hmanraw pawimawh a ni, tiin Governor chuan hmarchhak bial chu Art leh hnam ziarang mawina lamah a hausak thu pawh a sawi a. Helai biala artist ten an kutchhuak hralhna an neih that tawk loh thu tarlangin Lalit Kala Akademi chu hemi kawnga hmarchhak mite harsatna sukiang tura hma la turin a duh thu a sawi a. Thalai tam tak, hnathawh tur neilo ten Art hmanga eizawnna an hmuh theihna tur kawng dap a pawimawh thu pawh sawiin Governor chuan ram pum huap Art Festival hi India ram hmun hrang hrang atanga Artist lo fuankhawmte leh a bik takin Mizo Artist ten Art chawikan nan leh hmasawn nan an tangkai pui ngei a beisei thu a sawi a ni.

Khualzahawm Pu P.C.Zoram Sangliana pawhin thu sawiin Lalit Kala Akademi, Regional Centre, Kolkota hmalakna a kar hmasa lama Regional Painters Camp, Vanapa Hall-a buatsaih ah hmarchhak state hrang hrang leh Kolkota atangin lemziakmi 10 an tel thu a sawi a. Ram pum huap, National Art Festival Mizoram-a nghah a lo ni leh ta chu Mizoram tan bung thar a ni, tiin Art lama tuimite leh Mizoram-a visual art chawikanna tura theihtawp chhuahtu, artist tlemte te thawh rah a ni, a ti a. Lalit Kala Akademi hotute chungah lawmthu sawiin Mizo artist te tan hetiang programme tam zawk hi Mizoram-ah la buatsaih zel turin a sawm a. India ram hmun hrang hrang atanga artist lo kalte chu chibai bukin duhsakna a hlan bawk a ni.

Tun tum National Art Festival hi Mizoram-in a thlen vawi khatna niin kar khat chhung a awh dawn a. India ram state hrang hrang atangin artist 2 theuh bakah Mizoram atangin mi 4 an tel a ni. Hawnna inkhawm hi Dr.U.S.Tiwari, Consultant Lalit Kala Akademi Regional Centre in a kaihruai a. Dr.Sudhakar Sharma, Secretary, Lalit Kala Akademi chuan National Art Festival buatsaih dan leh Lalit Kala Akademi hmalakna te tarlangin thu a sawi a. Art & Culture Joint Director, Pu Ngurbiaka'n lawmthu sawina hun a hman hnu in Indian classical dancer, Kavita Dwibedi leh midang ten zai leh lam chi hrang hrang an entir a ni.